Татарстан Республикасы Авыл хуҗалыгы һәм азык-төлек министрлыгы башлыгы терлек азыгы әзерләү буенча агымдагы эш турында сөйләде
Терлек азыгы әзерләү эшләренең барышы турында бүген Татарстан Республикасы Хөкүмәте Йортында узган киңәшмәдә Татарстан Республикасы Премьер-министры урынбасары - Татарстан Республикасы авыл хуҗалыгы һәм азык-төлек министры Марат Җәббаров сөйләде. Киңәшмәне ТР Премьер-министры Алексей Песошин үткәрде.
Бүгенгә 103 мең тонна печән һәм 994 мең тонна сенаж әзерләнгән, бу шартлы 1 баш терлеккә исәпләгәндә 7,5 центнер азык берәмлеге тәшкил итә.
Планлаштырылган 299 мең га күпьеллык үләннәрнең 214 мең га чаптырылган - бу планнан 72%. Мөслим районы күпьеллык үләннәрне 1 тапкыр чаптыруны төгәлләгән. Әтнә, Сарман, Кукмара, Чистай һәм Тәтеш районнарында тәмамланган диярлек. Шул ук вакытта 5 районда мәйданнарның яртысы да җыеп алынмаган әле.
«Авыл хуҗалыгы оешмалары җитәкчеләренә мөрәҗәгать итәм: терлек азыгы әзерләүдә тоткарлыклар көн саен туклыклылыкны югалту, бу продуктивлыкны киметүгә һәм азык өстәмәләрен сатып алуга чыгымнарны арттыруга китерә», - диде министр.
Шәхси ярдәмче хуҗалыкларда 219 мең тонна печән әзерләнгән, ягъни ихтыяҗның 32 %ы. Катлаулы һава шартларына карамастан, 13 районда шәхси хуҗалыкларны агымдагы елның яртысына терлек азыгы белән тәэмин иткәннәр. Шул ук вакытта терлек азыгының дүрттән бер өлеше генә әзерләнгән 9 районда да эш начар куелган.
Марат Җәббаров шулай ук хуҗалыкларның урып-җыюга әзерлеге турында да сөйләде. Быелгы урып-җыю кампаниясен июльнең беренче декадасында башлау планлаштырыла, чөнки көзге рапсның беренче чәчүлекләре инде өлгерү стадиясенә җитеп килә. Көзге рапсның гомуми мәйданы 37,4 мең га тәшкил итә.
Хуҗалыкларда урып-җыю кампаниясен уздыру өчен 3100дән артык ашлык җыю комбайны бар. Оператив мәгълүматлар буенча аларның әзерлеге 90% тәшкил итә.