Рөстәм Миңнеханов: “Нефть химиясе куллануның эчке базарын үстерергә кирәк”

“Татнефтехиминвестхолдинг” ААҖ нең Директорлар советы Татарстан Премьер-министры Рөстәм Миңнеханов рәислегендә республиканың нефть-газ-химия тармагындагы кайбер проектларны карап чыкты. Утырышта аларның иң мөһиме итеп “Нижнекамскнефтехим” (НКНХ) ААҖ ндә 1 млн. тоннага кадәр егәрлеге булган этилен производствосын төзү проекты билгеләнде.
Компаниянең генераль директоры Владимир Бусыгин хәбәр иткәнчә, бу проектны тормышка ашыру нәтиҗәсендә предприятие 1,6 млн. тонна этилен чыгарачак. Аның күләменең төп өлеше үз полиэтиленыбызны чыгаруга китәчәк, 2009 елның гыйнварыннан НКНХ аны күпләп җитештерүгә керешә, ә бер өлеше базарга чыгарылачак.
Яңа производствоны төзү, фаразланганча, 2009 елның икенче яртысында башланачак. Аңа 2008 ел бәяләре белән 84 млрд. сум кирәк булачак. Проект файдалана башлауга 3 ел узгач үз бәясен кайтарырга тиеш. Рөстәм Миңнеханов моны Россия масштабында тиңдәшсез проект дип атады. Аның сүзләренә караганда, әлеге проектны тормышка ашыру Татарстанда нефть химиясе продукциясе җитештерүне берничә тапкыр арттырырга мөмкинлек бирәчәк. Премьер-министр НКНХга бу мәсьәләдә дәүләт тарафыннан максималь ярдәм күрсәтергә вәгъдә бирде.
М.В.Келдыш исемендәге Тикшерү үзәге идарәсе башлыгы Геннадий Коровин утырышта пар-газ ярдәмендә тәэсир итү методы белән югары үзле нефть һәм табигый битум чыгару проектын тәкъдим итте. Рөстәм Миңнеханов Татарстанда нефть чыгару стратегиясенең авыр нефтькә юнәлдерелүен искәртте. Утырышта күтәрелгән теманы бик актуаль дип атап, ул “Татнефть” ААҖ вәкилләре катнашында уртак эш төркеме булдырырга һәм аның эш нәтиҗәләрен нефть компаниясенең Директорлар советы утырышында карарга кушты.
Химия фәннәре докторы Ирина Иванова нефть химиясе буенча Мәскәү дәүләт университеты тарафыннан эшләнгән яңа технологияләрне тәкъдим итте. Аның сүзләренә караганда, борчулы хәл күзәтелә башлаган: МДУ ның күп кенә эшләнмәләре фәнни-тикшеренү эше стадиясендә көнбатыш компанияләре тарафыннан сатып алына, ә аннары, тиешенчә эшләнеп бетеп, Россия җитештерүчеләренә тәкъдим ителә.
Утырышта шулай ук сәнәгатьнең төрле тармаклары өчен әйбер төрә торган йомшак материал җитештерә торган “Данафлекс” Казан компаниясен тәкъдир итү булды. Компания тиешле сегментта Россия базарының 12 процентын алып тора. Рөстәм Миңнеханов, “Данафлекс” продукциясен тормышка ашыру кризислы айларда бөтенләй диярлек кимемәвен белгәч, моны эчке куллану базары үсеше файдасына тагын бер мисал буларак күрсәтте. Аның белән хәзер Кытай ныклап шөгыльләнә.
2009 елга Татарстанның нефть-газ-химия комплексында чимал белән үзара тәэмин итү исемлеге турында фикер алышу нәтиҗәләре буенча (бу турыда “Татнефтехиминвест-холдинг” ның генераль директоры Рафинат Яруллин чыгыш ясады) дөнья базарында нефть химиясе продукциясенә сорау кимү республика эчендә чимал белән тәэмин итү чылбырында өзеклеккә китерергә мөмкин икәнлеге ачыкланды. Шуңа бәйле рәвештә, Рөстәм Миңнеханов компанияләрне, кризис Татарстанда барлыкка килгән кооперация моделенә зыян китермәсен өчен, бу мәсьәләдә килешеп эшләргә чакырды.