Казанда «Агроволга" күргәзмәсе Россия төбәкләреннән һәм чит илләрдән 400 компанияне берләштерәчәк
Россиянең 38 төбәгеннән, шулай ук Кытай, Беларусь һәм Төркиядән 400дән артык компания «Агроволга 2026» халыкара агросәнәгать күргәзмәсендә катнашырга планлаштыра. Бу хакта Татарстан Республикасы Хөкүмәте Йортында узган брифингта Татарстан вице-премьеры - авыл хуҗалыгы һәм азык-төлек министры Марат Җәббаров хәбәр итте.
"Кытайдан 29 компания киләчәк, алар товарлар гына түгел, комплекслы технологик хәл ителешләр: кырларны мониторинглау өчен пилотсыз очу аппаратлары, геомәгълүмат системалары, авыл хуҗалыгы предприятиеләре белән идарә итү өчен интеллектуаль платформалар, шулай ук ашлык, үсемлек майлары һәм ашламалар эшкәртү өчен җайланмалар алып киләчәк», – дип сөйләде ул.
Белоруссия җитештерүчеләре гумин кислоталары нигезендә торфтан ясалган препаратлар һәм сөт-товар комплекслары өчен җайланмалар тәкъдим итәчәк. Алар шулай ук авыл хуҗалыгы техникасын ремонтлау һәм сервислау буенча үз мөмкинлекләрен күрсәтәчәкләр, диде министр.
Аның сүзләренә караганда, «Агроволга»га ел саен килүче Төркия компанияләре авыл хуҗалыгы культуралары өчен төрле типтагы һәм җитештерүчәнлектәге машиналар, төргәкләр һәм саклау тәкъдим итәчәк.
«Россия авыл хезмәтчәннәре өчен бу цифрлаштыруның практикада ничек эшләвен күрү һәм бу хәл ителешләрнең кайсыларын үзебезнең төбәктә, үз хуҗалыгыбызда гамәлгә кертергә мөмкин булуын бәяләү мөмкинлеге", - дип ассызыклады Авыл хуҗалыгы һәм азык-төлек министрлыгы башлыгы.
«Агроволга" зур экспозицияне, эшлекле форумны һәм тәҗрибә-демонстрация кырларын берләштерәчәк. Быел күргәзмәдә ике яңа бүлек – «Агротуризм» һәм «Спецтехника» оештырыла, диде М. Җәббаров.
"Бу күргәзмә кунакларына авыл туризмын, фермер хуҗалыкларын һәм авылда бизнесның яңа рәвешләрен үстерү өчен өстәмә хәл ителешләр табарга, шулай ук агросәнәгать комплексында нәтиҗәле эшләү өчен махсуслаштырылган техника һәм җайланмалар табарга мөмкинлек бирәчәк", – диде министр.
Эшлекле программа, министр сүзләренчә, 70тән артык чараны үз эченә ала, шул исәптән федераль экспертлар катнашында түгәрәк өстәлләр.
Күргәзмәнең сортларны сынау полигонында бөртекле, кузаклы, азык, майлы һәм техник культураларның 200дән артык алдынгы сортлары һәм гибридлары тәкъдим ителәчәк. «Быел шулай ук демокүрсәтүнең берничә зонасы игълан ителде, анда „Агроволга“ кунаклары техниканың реаль шартларда мөмкинлекләрен күрә алачак», – дип белдерде Авыл хуҗалыгы һәм азык-төлек министрлыгы башлыгы.
Моннан тыш, күргәзмә кысаларында «Агроволга гүзәле» VI республика конкурсы, мөгезле эре терлекләрнең тоякларын кисү буенча Халыкара студентлар спартакиадасы һәм Татарстанның иң яхшы механизаторлары арасында «МТЗ-Шоу» өченче чемпионаты узачак.
«Агроволга 2026» халыкара агросәнәгать күргәзмәсе «Казан Экспо»да 8 июльдән 10 июльгә кадәр узачак.