Алексей Песошин Алабугада яңа теннис кортларын ачуда катнашты

Татарстан Премьер-министры Алексей Песошин Алабугада яңа теннис кортларын ачуда катнашты. Кортлар Татарстан Рәисе Рөстәм Миңнеханов карары буенча төзелгән.

Тантанада шулай ук Алабуга районы башлыгы Рөстәм Нуриев һәм теннис буенча Олимпия уеннарының бронза призеры Надежда Петрова катнашты. 

Надежда Петрованың зур теннис мәктәбе филиалын Алабугада 2024 елда ачканнар иде. Башта базада биш корт эшләгән, ә бүген тагын ике яңасы ачылды.

Алексей Песошин ассызыклаганча, республикада спорт инфраструктурасын төзү, массакүләм спортны һәм югары казанышлар спортын үстерү буенча зур эш алып барыла. "Бүгенге көндә республикада теннис белән 3,5 меңнән артык кеше шөгыльләнә, спорт мәктәпләрендә теннис буенча 4 бүлек ачылды. Татарстан илнең иң спортлы төбәге булып таныла, анда ел саен 40 теннис турниры үткәрелә», - дип билгеләп үтте ТР Премьер-министры. 

Теннис буенча Олимпия призеры Надежда Петрова Татарстанда бик күп спорт чаралары һәм фестивальләр узуын, балалар теннис базасы актив үсүен билгеләп үтте. "Һәм безнең эш - үзенә күрә күчеш күпере ул: без күнекмәләр бирәбез, база куябыз, теннисчыны билгеле бер дәрәҗәгә әзерлибез. Ә аннары алга таба барырга мөмкин - ярышларда катнашырга, җыелма командага керергә", - диде танылган теннисчы. 

Ике өстәмә корт ачылу шәһәрдә тулы канлы турнирлар уздыру мөмкинлеге бирә. Бирегә башка шәһәр һәм төбәкләрдән дә уенчылар килә алачак. Хәзер тренерлар командасында 5 югары квалификацияле тренер эшли, һәм аларның саны базаны киңәйтү белән бергә үсәчәк.

Алексей Песошин шулай ук спорт объектын карап чыкты һәм яшь теннисчылар арасындагы ярышларны карады. 

Яңа объектлар Россиянең төрле шәһәрләреннән күп санлы балаларга танылган спортчы белән күнегүләр ясарга, шулай ук спорт белән шөгыльләнүгә шәһәр халкын җәлеп итәргә мөмкинлек бирәчәк, бу «Россия спорты» дәүләт программасы максатларына туры килә.