«Алтын мөнбәр» XXII Казан халыкара кинофестивален оештыручылар һәм жюри әгъзалары утырышы булды
Татарстан Республикасы Министрлар Кабинетында «Алтын мөнбәр» XXII Казан халыкара кинофестивален уздыруга финал әзерлегенә багышланган төп утырыш узды.
"Алтын мөнбәр" XXII Казан халыкара кинофестивале Россия Федерациясе Мәдәният министрлыгы тарафыннан хупланган кинопроектлар исемлегенә керә һәм Татарстан Республикасы Рәисе Рөстәм Миңнеханов ярдәме белән уза.
Очрашуны Татарстан Республикасы Премьер-министры урынбасары, фестивальнең оештыру комитеты рәисе Васил Шәйхеразыев һәм фестиваль Президенты, Баш мөфти шәех Равил Гайнетдин уздырды.
Утырышта шулай ук Татарстан Республикасы мәдәният министры Ирада Әюпова, фестивальнең жюри әгъзалары, жюри рәисе, танылган Иран режиссеры Мәҗит Мәҗиди, шулай ук Алжир, Оман, Иордания, Малайзия, Россия һәм Һиндстаннан халыкара экспертлар катнашты.
Очрашу барышында быелның гариза бирү кампаниясе йомгаклары буенча фикер алыштылар. Фестиваль зур халыкара кызыксыну уятты: 67 илдән килгән кинематографистлар үз эшләрен игълан иттеләр. Оештыру комитеты адресына төрле жанрдагы 1030 фильм керде, бу узган ел күрсәткечләреннән артып китә. Фестиваль тарихында беренче тапкыр Венесуэла, Бруней Солтанлыгы һәм Того картиналары тәкъдим ителде.
Конкурс программасына 55 картина сайлап алынган. Быел профессиональ номинацияләрне киңәйтүгә аерым игътибар бирелде: төп конкурс «Иң яхшы тавыш режиссурасы өчен» һәм «Фильмның иң яхшы музыкаль бизәлеше өчен» категорияләре белән тулыланган, ә Милли конкурс кысаларында беренче тапкыр «Иң яхшы милли сериал» сайлап алыначак.
Васил Шәйхеразыев һәм Равил Гайнетдин, «Россия – Ислам дөньясы» программасы кысаларында мәдәниятләр диалогы мәйданчыгы буларак, фестивальнең мөһим ролен ассызыкладылар. Бу юнәлеш кысаларында тамашачыларга Иран, Оман, Үзбәкстан, Марокко, Һиндстан, Гыйрак һәм башка илләрдән 10 фильм күрсәтеләчәк. Россия кинематографиясен бу программада Станислав Сапачевның «Переговорщик «операция Дамаск" тасмасы тәкъдим итәчәк.
Конкурс күрсәтүләреннән тыш, фестиваль программасына киноиндустрия белгечләрен, продюсерларны һәм мәгариф вәкилләрен берләштерүче зур эшлекле мәйданчык та керә. Мәйданчык өч юнәлеш буенча эшләячәк: Казан халыкара кино базары, халыкара кинопроектлар питчингы һәм белем бирү мастер-класслары.
Тамашачылар өчен дөньядагы иң яхшы картиналарны күрсәтүне, «Мисыр киносы көннәре», «Гарәп киносы көннәре», «Төрки дөнья» тематик циклларын, шулай ук «Ленфильмның «Алтын коллекциясе» һәм «Тукайга – 140 (Татаркино архивыннан)» ретроспективаларын үз эченә алган конкурстан тыш киң программа әзерләнгән.