Казанда яшь IТ-чемпионнарны бүләкләделәр

Бүген Казанның ИТ-паркында «IТ-чемпион» республика конкурсына йомгак ясалды. Конкурста җиңүчеләргә бүләкләрне Татарстан Премьер-министры Илдар Халиков тапшырды.

Конкурста 253 меңнән артык укучы катнашты. Алар ТР дәүләт һәм муниципаль хезмәтләре порталы белән эшләргә 320 меңнән артык өлкәннәрне өйрәткән.
Һәр этап нәтиҗәләре буенча һәрбер муниципаль районнан 3 иң актив укучы iPad планшетлары белән бүләкләнде.

2013 елның март аенда конкурс башланганда Дәүләт хезмәтләре порталында 325 мең шәхси кабинет булса, хәзер шәхси кабинетларның саны 900 меңгә кадәр арткан.
“IТ-чемпион” конкурсы ярдәмендә ай дәвамында күрсәтелә торган хезмәтләрнең саны 60%ка арткан. 2012 нче елда Татарстанлыларга 16,3 млн. электрон хезмәт күрсәтелсә, 2013 нче елда - 25,8 млн. хезмәт күрсәтелгән.

Бүген иҗади номинациядә җиңүчеләргә бүләкләрне ТР вице-премьеры – мәгълүматлаштыру һәм элемтә министры Роман Шәйхетдинов һәм ТР вице-премьеры – фән һәм мәгариф министры Энгель Фәттахов тапшырды.

Бүләкләр тапшыру алдыннан Илдар Халиков конкурста катнашучыларга мөрәҗәгать итте. “Бүген мин үзебезнең балалар өчен горурлану хисе кичерәм. Сез - илдә иң яхшылар, бүген сез бик күп өлкәннәрдән уздырдыгыз”,-диде ул.

“Бу проект Татарстан Президенты Рөстәм Миңнеханов идеясе иде, ул без көткәннән дә күләмлерәк килеп чыкты. Татарстан Президенты карары белән конкурс киләсе елда да дәвам итәчәк”, дип хәбәр итте Илдар Халиков.

Илдар Халиков балаларны һәм аларның әти-әниләрен Яңа ел белән котлады, аннан соң бүләкләр тапшырды. Актаныш укучысы Инзилә Нәбиева иң күп балл җыеп, төп призны – Париж Диснейлендына юллама алды.