Татарстанда «Безнең ишегалды" программасы буенча эшләр төгәлләнгән
«Безнең ишегалды» республика программасы кысаларында 2026 елда Татарстанда 13 муниципалитетта 560 ишегалды территориясе төзекләндерелгән. Быелгы барлык эшләр төгәлләнгән. Төзелеш сезоны нәтиҗәләрен ТР Хөкүмәте Йортында узган киңәшмәдә «ТР шәһәрләрен үстерү институты» фонды директоры Наилә Нагуманова тәкъдим итте. Киңәшмәне Татарстан Рәисе Рөстәм Миңнеханов үткәрде. Анда Татарстан Премьер-министры Алексей Песошин да катнашты.
Быел эшләр 904 күп фатирлы йорт ишегалдында барган, аларда 190 меңнән артык кеше яши. Хәзер йомгаклау чаралары бара: ишегалды территорияләрен кабул итү, җайланмаларны идарәче оешмалар балансына тапшыру, йомгаклау башкарма документациясен әзерләү һәм тапшыру.
Узган еллар белән чагыштырганда, юл эшләренең оештыру һәм сыйфаты яхшырган. Кисәтүләрне эшкәртү тизлеге 35%ка арткан, төзелеш мәйданчыкларын оештыруга карата кисәтүләр саны 25%ка кимегән, туфрак салу һәм башка база эшләренең сыйфаты 20%ка арткан, ә эшләрнең гомуми дәвамлылыгы 12%ка кимегән.
Тышкы яктыртуларны тоташтыру вакыты да сизелерлек кыскарган. Әгәр элегрәк терәк куюдан ут кабызуга кадәр уртача бер ай чамасы вакыт узган булса, быел җиде көн чамасы. Шул рәвешле, тоташтыру вакыты 77%ка кыскарган.
Район администрацияләре һәм идарәче оешмалар программаның база исемлеген үз инициативалары белән тулыландыралар. Әйтик, алты районда өстәмә рәвештә кара туфрак кайтаралар, газоннар чәчәләр, куаклар һәм агачлар утырталар. Ә Казанда, Чаллыда һәм Биектау районында ишегалларына юл билгеләре куйганнар.
Түбән Камада төзекләндерү эшләре инженерлык челтәрләрен яңарту белән тәңгәлләштерелгән: башта коммуникацияләр яңартылган, аннары ишегалдында төп эшләр башкарылган. Мондый тәртип яңа өслекне бозып яңадан ачуны булдырмаска мөмкинлек бирә. 2026 елда 21 ишегалдында кайнар су белән тәэмин итү һәм җылы ирү челтәрләре алыштырылган.
«Безнең ишегалды» программасын гамәлгә ашыруның 7 елында Татарстанда республиканың 45 муниципалитетында 6 мең 411 ишегалды территориясе төзекләндерелгән. Бу вакыт эчендә 14 млн. кв. м асфальт җәелгән, 100 меңнән артык кече архитектура формасы һәм 45 меңнән артык яктырту баганасы урнаштырылган. Республиканың 1,8 миллионнан артык кешесе, шул исәптән 350 мең бала, төзекләндерүдән турыдан-туры нәтиҗә алган.