ТР Хөкүмәт Йортында Яңа ел бәйрәмнәренә йомгак ясалды

Бүген ТР Хөкүмәт Йортында узган брифингта Татарстанда Яңа ел һәм Раштуа бәйрәмнәрен үткәрүгә йомгак ясалды.
ТР яшьләр эшләре, спорт һәм туристлык министры Рафис Борһанов беренче чиратта республикада Олимпия уты эстафетасы узу турында искә төшерде. Татарстанда бу эстафетада 370 кеше катнашты, шуларның 80 не республиканыкылар, ә калганнары Россиянең башка төбәкләреннән килүчеләр иде.

Яңа ел каникуллары вакытында Казанда 15 шугалак һәм 6 чаңгы юлы эшләде. ТР муниципаль районнарында да төрле чаралар узды.

Татарстан мәдәният министры Айрат Сибагатуллин республикада Яңа ел каникуллары вакытында узган киң күләмле мәдәният чаралары турында сөйләде.
Республиканың 21 театр-тамаша учреждениеләрендә якынча 500 чара уздырылды. Иң күп тамаша “Әкият” Татар дәүләт курчак театрында, Әлмәт татар дәүләт драма театрында, Буа дәүләт драма театрында, Г.Тукай исемендәге татар дәүләт филармониясендә, С.Өметбаев исемендәге Минзәлә татар дәүләт драма театрында күрсәтелде. Дәүләт музейларында һәм музей-саклаулыкларда балалар өчен якынча 30 чара оештырылган иде. Барлык бәйрәм чаралары да план буенча, тыныч узды.

Гадәттән тыш хәлләр министрлыгының ТР буенча баш идарәсе башлыгы урынбасары Сергей Сергеев хәбәр иткәнчә, 31 декабрьдән 8 гыйнварга кадәр республикада 67 янгын очрагы теркәлгән, янгында 7 кеше үлгән. Шуның белән бергә киң күләмле бәйрәм чаралары булган объектларда янгын очраклары булмаган.

ТР буенча Эчке эшләр министрлыгы тарафыннан шулай ук Яңа ел каникуллары вакытында иминлекне тәэмин итү буенча барлык каралган чаралар гамәлгә ашырылган.