Алексей Песошинны Татарстан Республикасы Премьер-министрының беренче урынбасары итеп билгеләп кую турында Татарстан Республикасы Президенты Указына имза салынды
Алексей Песошин Татарстан Республикасы Премьер-министрының беренче урынбасары итеп билгеләп куелды.
Әлеге Указга бүген Татарстан Республикасы Президенты Рөстәм Миңнеханов имза салды.
Исегезгә төшерәбез, 2013 елның декабрь азагында, Татарстан Республикасы Дәүләт Советы утырышында Татарстан Республикасы Премьер-министрының беренче урынбасары вазыйфасына Алексей Песошин кандидатурасы республика парламенты тарафыннан расланды.
Белешмә өчен:
Алексей Валерьевич Песошин 1963 елның 9 декабрендә Казанда туган.
1986 елда В.И.Ульянов-Ленин исемендәге Казан дәүләт университетын тәмамлаган (инженер-механик), гыйльми дәрәҗәсе бар - физика-математика фәннәре кандидаты.
1986-1995 елларда Казан дәүләт университетының фәнни хезмәткәре булып эшли.
1995-2000 елларда - Казан шәһәре Совет районының “Жилбытсервис” 79 нчы ЖЭУ белгече, баш инженер урынбасары, башлыгы.
2000-2002 елларда – “Казанский завод газовой аппаратуры – Веста” ААҖ директоры урынбасары, баш инженеры.
2002-2007 елларда - “Казанский завод газовой аппаратуры – Веста” ААҖ генераль директоры.
2007 елда “Золотой колос” ЯАҖ ХК генераль директоры – “Приволжская продовольственная корпорация” ҖЧҖ идарәче компаниясе директоры.
2007-2010 елларда – Казан шәһәре муниципаль берәмлеге Башкарма комитетының Совет районы хакимияте башлыгы.
2010 елда Казан шәһәре муниципаль берәмлеге Башкарма комитеты җитәкчесе урынбасары булып эшли.
2010 елдан 2014 елның гыйнварына кадәр – Казан шәһре муниципаль берәмлеге Башкарма комитеты җитәкчесе.
Дәүләт бүләкләре бар - “Бөтенроссия халык санын алуны уздырган өчен” медале (2002 ел), “Казанның 1000 еллыгы истәлегенә” медале (2005 ел), “Фидакарь хезмәт өчен” Татарстан Республикасы медале (2009 ел), Татарстан Республикасы Президенты Рәхмәте (2013 ел).