Казанда энергетикларны Универсиадага әзерләнүдә катнашулары өчен бүләкләделәр

Бүген Казанда 2013 елгы Универсиадага әзерләнүдә, аны уздыруда һәм өзлексез электр белән тәэмин итүдә катнашкан энергетикларны хөрмәтләүгә багышланган тантаналы чара узды. Татарстанның Дәүләт бүләкләрен энергетикларга ТР Премьер-министры Илдар Халиков тапшырды.

Казанда Бөтендөнья студентлар уеннарын электр белән тәэмин итүдә “Сетевая компания” ААҖ, шулай ук Татарстанның һәм Россиянең башка төбәкләре компанияләре, федераль энергетика компанияләре катнашты.Универсиадага әзерләнү һәм аны уздыру вакытында РФнең Казан энергия төенен электр энергиясе белән тәэмин итүгә бәйле барлык энергообъектлары штаттагы режимда эшләделәр һәм электр энергиясе белән тәэмин итү тулы күләмдә башкарылган.

Татарстан Премьер–министры Илдар Халиков үзенең котлавында энергетикларны хезмәттәшләр дип атады. “Сезнең белән бергә без зур һәм җитди эш эшләдек. Бу эшне башлаганда башкарып чыгуыбызга ышанып булмады. Әмма Универсиада ачылышы көне, безнең планлаштырылган эшне һәм аннан да күбрәкне башкарып чыга алуыбызны күрсәтте”, - дип ассызыклады ул.

“Универсиадага әзерлек вакытында миңа төзелештә, объектларда күп энергетиклар белән иңгә-иң булырга туры килде. Мин сезнең илгә, республикага булган тугрылыгыгызга чын күңелдән сокланам”, - дип белдерде Татарстан Премьер-министры.

Татарстан Хөкүмәте җитәкчесе республика Президенты һәм шәхсән үз исеменнән Универсиада вакытында өзлексез электр энергиясе белән тәэмин итүчеләргә рәхмәт белдерде һәм ТР дәүләт бүләкләре, һөнәри исемнәр һәм Рәхмәт хатлары тапшырды. Татарстан республикасының “Намуслы хезмәте өчен” медале белән “Сетевая компания” ААҖ идарәсенең билгеләү челтәрләре хезмәте башлыгы Фәрит Шәйхетдинов, “Сетевая компания” ААҖнең оператив-техник идарә итү буенча техник директор урынбасары - челтәрләр белән идарә итү үзәге җитәкчесе Равил Баязитов, “Сетевая компания” ААҖ филиалы Казан электр челтәрләренең Киндерле подстанциясе баш инженеры Сергей Васильев, “Сетевая компания” ААҖ идарәсенең капиталь төзелеш идарәсе җитәкчесе Вадим Чернов, “Сетевая компания” ААҖ идарәсенең Казан электр челтәрләренең капиталь төзелеш идарәсе директоры урынбасары Сәлим Шәрәфиев бүләкләнде.