Илдар Халиков: “Эпидемияләрнең булмавы – Роспотребнадзор эшенә төп бәя”

2013 елда Татарстан шәһәр һәм районнарында эпидемияләр, авырулар һәм агулану белән бәйле хәлләр теркәлмәгән, бу Кулланучылар хокукларын яклау һәм кеше иминлеге өлкәсендә күзәтчелек буенча федераль хезмәтнең (Роспотребнадзор) Татарстан Республикасы буенча идарәсе эшенең төп уңай нәтиҗәсе булып тора. Мондый фикерне бүген ТР Премьер-министры Илдар Халиков, ведомствоның йомгаклау коллегиясендә чыгыш ясаганда белдерде.

Роспотребнадзор эше нәтиҗәләре турында ведомство җитәкчесе Марина Патяшина доклад ясады.
Ул белдергәнчә, 2013 нче елгы эшчәнлекнең төп нәтиҗәсе – Казанда Универсиаданы уңышлы уздыру. Студентлар уеннары объектларында 290 белгеч эшләгән. Универсиада көннәрендә, 16 меңгә якын лаборатор тикшеренү үткәрелгән, алар барышында продуктларның стандарт булмаган 63 пробасы алынган. Шул ук вакытта спортчылар арасында йогышлы һәм паразитар авыруларның бары 30 очрагы гына теркәлгән. Марина Патяшина сүзләренчә, бу уңай нәтиҗә.

Универсиадага әзерлек Урта Кабан күлен чистартырга этәргеч булган. Хәзерге вакытта аның торышы санитар нормаларга җавап бирә.

Идарә тарафыннан мигрантлар белән эшләү дә уздырылды. Туберкулез яисә ВИЧ белән авыручы 40 мигрантны депортацияләү турында карар кабул ителде. Шуның белән бергә, республикадан бары тик 21 генә киткән, ә 17 сенең кайда булуы билгесез.

2013 елда идарәгә кулланучылар хокукларын бозу буенча гражданнардан 6787 мөрәҗәгать килгән, шуларның 70% ы нигезле булып чыккан һәм 11 млн сумлык штраф салынган.

Коллегия эшенә үзенең чыгышында Илдар Халиков йомгак ясады. Аның сүзләренчә, Универсиада исемле имтиханны идарә бик яхшы билгеләренә тапшырган.
Мөһим мәсьәлә булып, Илдар Халиков сүзләренчә, халыкны эчәргә яраклы сыйфатлы су белән тәэмин итү. Бу юнәлештә ТР Төзелеш, архитектура һәм торак-коммуналь хуҗалык министрлыгы, муниципаль берәмлекләр белән берлектә, эш алып бара. “Чиста су” программасы формалаштырылганда, кем иртәрәк мөрәҗәгать итүенә түгел, ә аеруча имин булмаган участокларга басым ясалырга тиеш. Программа сезнең анализ буенча төзелергә тиеш”, - дип мөрәҗәгать итте Илдар Халиков идарә вәкилләренә.
Шундый ук практика мәктәпләрне һәм балалар лагерьларена капиталь төзекләндерү кирәклеген билгеләгәндә кулланылырга тиеш, диде Илдар Халиков.

Премьер-министр белдергәнчә, сукбай этләр белән бәйле статистика да сөендерми. “11500 кешенең хайваннар тешләвенә дучар булуы – куркыныч сан. 45 муниципаль берәмлекнең 40 ында котыру авырулары теркәлгән. Без имин, уңышлы республикада яшибез, шуңа күрә бу күренешләр белән килешеп яшәү мөмкин түгел!”, - дип белдерде Илдар Халиков

Мигрантлар белән эш мәсьәләсендә ТР Премьер-министры фикеренчә, аларның сәламәтлегенә игътибарлырак булырга кирәк. “Бездә мигрантлар ташкыны зур. Без республика халкын алардан чир йоктырудан сакларга тиеш”,-дип саный И. Халиков.

ТР Хөкүмәте башлыгы халыкны вакцинацияләү мәсьәләсе аеруча игътибар бирде. уңаеннан да борчылуын җиткерде. “Бу өлкәдә Татарстанның аутсайдер булуына юл куярга ярамый”,-дип ассызыклады ул.

Коллегия тәмамланганда ТР Хөкүмәте башлыгы ведоомство хезмәткәрләренә нәтиҗәле эшләре өчен рәхмәт белдерде һәм бүләкләр тапшырды.