Олимпиадада “алтын” откан Татарстан спортчыларына ТР Хөкүмәтеннән 4 млн сум акча биреләчәк

Сочида узачак Олимпиадада алтын медаль яулаган спортчылар Россия Федерациясе Хөкүмәтеннән 4 әр миллион сум акча алачак. Беренчелеккә лаек булган Татарстан спортчыларына шулай ук 4 миллион сум акчалата премия биреләчәк.

Бу хакта бүген Татарстан Республикасы Министрлар Кабинетында узган брифингта ТР яшьләр эшләре, спорт һәм туризм министры Рафис Борһанов хәбәр итте.

Министр билгеләп узганча, Татарстан Хөкүмәте алтын, көмеш һәм бронза отучы республика спортчыларына ил Хөкүмәте раслаган суммага тәңгәл премияләр бирергә карар кылган. Шул рәвешле, ТР Хөкүмәтеннән, федераль премияләргә өстәмә рәвештә, көмеш медаль ияләренә – 2, 5 әр миллион сум һәм бронза алучыларга 1,7 әр млн сум акча тиячәк. “Тренерларга килгәндә, аларга үзләре кулы астында тәрбияләнгән спортчыга бирелгән акчаның 50 проценты күләмендәге премия каралган”, - дип белдерде Рафис Борһанов.

Шуны да билгеләп узарга кирәк: Паралимпия уеннарында медаль алу бәхете елмайган спортчыларга РФ һәм ТР Хөкүмәтләреннән шушы ук суммадагы премияләр тапшырылачак.

Рафис Борһанов искәртеп узганча, Олимпия уеннарында Россия җыелма командасы составында Татарстан данын яклап 8 спортчы чыгыш ясаячак. “Ак Барс” хоккей командасы уенчылары – Александр Свитов, Алексей Терещенко, Евгений Медведев, Илья Никулин , чаңгыда ике төр ярыш осталары Нияз Нәбиев һәм Иван Панин һәм чаңгы спорты вәкилләре Наталья Жукова һәм Анастасия Доценко медальләр алырга омтылачак. 7-16 март көннәрендә узачак Паралимпия уеннарында исә республикадан ике чаңгычы, биатлончылар Марта Зәйнуллина һәм Рушан Миңнегулов катнашачак.