Илдар Халиков: “Инвестиция проектлары Югары Ослан районы киләчәгенә ышаныч бирә”

Сәнәгать өлкәсендәге инвестиция проектлары һәм зур Иннополис проекты ТРның Югары Ослан районы икътисады үсешендә уңышлы дәлил булып тора. Бу хакта бүген Татарстан Премьер-министры район Советының йомгаклау сессиясе барышында белдерде.

Югары Осланда Илдар Халиков 24 фатирлы яңа йортта булды. Бөек Ватан сугышы ветераны 86 яшьлек Анастасия Тарасовага бу ике бүлмәле фатир ветераннар өчен торак төзү программасы буенча бирелә. Илдар Халиков аңа телевизор бүләк итте.

Татарстан Хөкүмәте башлыгы шулай ук “Югары Ослан ветеринария берләшмәсе” баш идарәсендә булды, аның биналары 2013 елда төзекләндерелә. ТР Министрлар Кабинетының Ветеринария баш идарәсе башлыгы Алмаз Хисаметдинов сүзләренчә, капиталь төзекләндерү 4 млн сум тәшкил итә. 2014 елда тагын 17 объектта төзекләндерү планлаштырылган.

Аннан соң Илдар Халиков Югары Ослан районы Советы утырышында катнашты. Утырышта шулай ук РФ Дәүләт Думасы депутаты Айрат Хәйруллин, ТР муниципаль берәмлекләр Советы рәисе Минсәгыйть Шакиров катнашты.

Югары Ослан районының социаль-икътисади үсеше турында район башлыгы Марат Зыятдинов доклад ясады. Аның сүзләренчә, муниципаль берәмлекләр рейтингында район 18 урынны ала. Сәнәгать предприятиеләре 2 млрд сумга үзләре җитештергән продукция чыгара.
Авыл хуҗалыгы предприятиеләре 2013 елда 767 млн сумга продукция җитештергән.

2013 елда районда 21 мең квадрат метр яңа торак төзелгән. Шулай ук М. Зыятдинов районда республика программаларының гамәлгә ашырылуы турында сөйләде.
Илдар Халиков фикеренчә, Югары Ослан районында күп кенә перспективалы проектлар гамәлгә ашырыла, һәм районның икътисади үсеш дәрәҗәсе үсәчәк. Сәнәгать инвестиция проектлары белән бергә, районда дөньякүләм федераль проект – Иннополис гамәлгә ашырыла. “Районның киләчәге бар, яшьләрнең үз эшләрен табарга мөмкинлекләр бар”,-дип ышана ТР Премьер-министры.

Илдар Халиков сүзләренчә, гомумән, 2013 елда Югары Ослан районы күп эшләр эшләгән, һәм 2014 елда яхшы перспективалары бар. “Чын күңелдән районның 2014 елда алга куелган бурычларның барысын да үтәвен телим”,- диде ул.

Сессия тәмамланганда Премьер-министр районның алдынгыларына бүләкләр тапшырды.