Татарстанның финанслар министры Радик Гайзатуллин: “2008 елда республиканың консолидацияләнгән бюджетына 139,2 млрд. сум керде”

2008 ел нәтиҗәләре буенча Татарстан Республикасының консолидацияләнгән бюджетына 139,2 млрд. сум кергән, шул исәптән салым керемнәре һәм салымнан тыш керемнәр – 114,9 млрд. сум, федераль акча – 24,3 млрд. сум.
Бүген Татарстан Республикасы Финанслар министрлыгы, Татарстан Республикасы Федераль салым хезмәте идарәсе, Татарстан Республикасы Федераль казначылык идарәсенең уртак йомгаклау коллегиясендә бу турыда Татарстанның фмнанслар министры Радик Гайзатуллин хәбәр итте.
Коллегия “Ак Барс” яшьләр мәдәни үзәгендә узды, чарада Татарстан Премьер-министры Рөстәм Миңнеханов, Федераль казначылык җитәкчесе Роман Артюхин һ.б. катнашты.
Татарстан Республикасы финанслар министры хәбәр иткәнчә, узган елда республика бюджетына 114,8 млрд. сум кергән, шул исәптән үз керемнәре – 89,8 млрд. сум.
Җирле бюджетларда 25,1 млрд. сум салым керемнәре һәм салымнан тыш керемнәр тупланган.
2008 елда консолидацияләнгән бюджетның чыгымнар өлеше 146,3 млрд. сум күләмендә тотылган.
Республика бюджеты буенча касса чыгымнары 119,4 млрд. сум тәшкил иткән, җирле бюджетларга бюджетара трансфертлар 30,5 млрд. сум күләмендә тулысынча бүлеп бирелгән.
Җирле бюджетларның чыгымнар өлеше 58,1 млрд. сум тәшкил иткән.
2008 елда, шушы чыгымнардан алып, бюджет оешмаларында эшләүчеләргә 1 нче февральдән хезмәт хакы 14 % ка арттырып түләнгән.
Радик Гайзатуллин шулай ук бюджет учреждениеләрен автоном учреждениеләргә күчерү процессы турында сөйләде. Автоном учреждениеләр статусын алып, 159 мәгариф учреждениесе, 7 мәдәният учреждениесе һәм 25 социаль тәэминат учреждениесе яңа шартларда эшли башлаган инде. Нәтиҗәдә социаль яклау учреждениеләрендә хезмәт хакы 47 % ка артып, уртача 9,6 мең сум тәшкил иткән.
“2009 елда бюджет учреждениеләрен автоном учреждениеләргә күчерүне дәвам итәргә кирәк”, - диде Татарстан Республикасы Финанслар министрлыгы башлыгы.
Ул шулай ук 2009 елда республикада, 185 нче номерлы Федераль закон нигезендә, күп фатирлы торак йортларга капиталь ремонт ясау программасы дәвам итәчәге турында сөйләде. Төрле бюджетлар һәм халыктан кергән акча хисабына 2009 елда финанслау 9,7 млрд. сум күләмендә булыр дип көтелә.
2008 елда моңа бөтен чыганаклар хисабына 4,2 млрд. сум бирелгән. Нәтиҗәдә 400 меңнән артык кеше яшәгән 2 мең 66 күп фатирлы йортка ремонт ясалган.
Моннан тыш, 1,5 млрд. сум төзекләндерү, юлларга капиталь ремонт ясау һәм торак пунктларның инженерлык инфраструктурасын үстерү буенча өстенлекле программаларны тормышка ашыруга бүлеп бирелгән. Радик Гайзатуллин Татарстан Республикасы Президенты каршындагы Дәүләт торак фондына түләүләр мәсьәләсенә аерым тукталды.
2008 елда Дәүләт торак фондына керемнәр, федераль һәм республика бюджетларыннан бирелгән акча хисабына, 6,3 млрд. сум тәшкил иткән.
2008 елда социаль ипотека программасын тормышка ашыруга, халыктан кайтарып алына торган акчаны һәм кредит ресурсларын исәпкә алып, 13,6 млрд. сум бирелгән. Бу республикада яшәүчеләр өчен 10 мең 569 фатир төзү мөмкинлеге биргән.
Коллегиядә Татарстан Республикасы Федераль салым хезмәте идарәсе җитәкчесе вазыйфасын башкаручы Марат Сафиуллин, Татарстан Республикасы Федераль казначылык идарәсе җитәкчесе Марат Зарипов, Татарстан Республикасы Хисап палатасы рәисе Алексей Демидов, Татарстан Республикасы Милли банкы рәисе Евгений Богачев һ.б. доклад белән чыгыш ясадылар.