Юрий Камалтынов Мамадыш районында эшлекле очрашуда булды

Бүген Татарстан Республикасы Премьер-министры урынбасары Юрий Камалтынов Мамадыш муниципаль районында булды. Ул Мамадыш районы Советы сессиясендә катнашты. Юрий Камалтынов шәһәрнең берничә оешмасында һәм “Мамадыш” совхозы поселогында 40 фатирлы торак йорт ачылышы тантанасында булды.

Юрий Камалтынов шулай ук Мамадыш спирт заводында булды. Кунаклар спирт җитештерү буенча яңа цехларны карадылар. Инновацияләрне гамәлгә ашыруга 350 млн сум инвестиция акчасы тотылган.

Дәрәҗәле кунаклар 87 нче һөнәри көллияттә булдылар. Анда алар педагоглар коллективы һәм җитештерү мастерларының эшчәнлеге белән таныштылар.

2013 елда район ирешкән күрсәткечләр турында район Советының29 нчы утырышында сөйләделәр. Аның эшендә РФ Дәүләт думасы депутаты Радик Ильясов, ТР муниципаль берәмлекләр Советы рәисе Минсәгыйть Шакиров, “ТР Президенты каршындагы Дәүләт торак фонды” коммерцияле булмаган оешманың башкарма директоры Тәлгат Абдуллин катнашты.

Мамадыш районы башлыгы Анатолий Иванов социаль-икътисади үсеш һәм 2014 елга планнар турында доклад ясады. 2013 елда авыл хуҗалыгы продукциясе 1 млрд 386 млн сумлык җитештерелгән, товар сату 3%ка арткан.
Сәнәгать өлкәсендә 3млрд 715 млн сумга эш башкарылган, төзелеп ятучы кирпеч заводы яңа үсеш перспективаларын ача.

Юрий Камалтынов йомгаклау чыгышында Мамадыш районының социаль үсеш өлкәсенә аеруча югары бәя бирде. Сессия тәмамланганда ул район алдынгыларына дәүләт бүләкләрен тапшырды.