Казанда “Куркынычсызлык һәм элемтә” форумы ачылды

27 февральдән 1 мартка кадәр Казанда “Куркынычсызлык һәм элемтә” форумы үтә. Әлеге чара кысаларында “Куркынычсызлык”, “Элемтә”, “Сак һәм хезмәт куркынычсызлыгы” күргәзмәләре, шулай ук “Тормыш куркынычсызлыгының бүгенге көн проблемалары: хәзерге вакыт һәм киләчәк” исемле III Халыкара фәнни-гамәли конференция үткәрелә.

Конференция кысаларында медицина, экология , транспорт һ.б. өлкәләрдәге куркынычсызлык турында сөйләшәчәкләр һәм тәҗрибә уртаклашачаклар. Күргәзмәләр эшчәнлегендә Россиянең 15 төбәгеннән һәм дөньяның 13 иленнән 130дан артык компания катнашачак. Биредә кеше тормышының барлык өлкәләрендә дә куркынычсызлык тәэмин итәрдәй өр-яңа казанышлар һәм алдынгы идеяләр демонстрацияләнәчәк.

Форумны ТР Премьер-министры Илдар Халиков ачып җибәрде. Ул чарада катнашучылар ярдәме белән Универсиада-2013не югары дәрәҗәдә үткәрүгә ирешүләре турында әйтеп узды. Премьер-министр сүзләренчә, җиһазлар, программалар һ.б. заманча технологияләр ярдәмендә куркынычсызлык тәэмин итүдә зур уңышларга ирешелгән.

“Узган еллардагы кебек үк, күргәзмә хезмәттәшлек, партнерлык итүнең яхшы коралы булыр дип уйлыйм. Димәк, республика халкының куркынычсызлыгын тәэмин итүдә дә яңа система төзергә мөмкинлек туачак”, - диде чараның әһәмиятлелеген ассызыклап И. Халиков.

Чарада РФ Эчке эшләр министрлыгының җәмәгать тәртибен саклауны һәм РФ субъектлары башкарма хакимияте белән багланышларны координацияләү буенча Баш идарәсе җитәкчесе Юрий Демидов, Россия ЭЭМның Юл хәрәкәте иминлеген тәэмин итү буенча Баш идарә җитәкчесе урынбасары Владимир Кузин һәм башкалар катнашты.

Юрий Демидов фәнни учреждениеләрнең хезмәткәрләренә Казанда җыелып күрешүенең бик әһәмиятле күренеш булуына басым ясады. “Хәзерге вакытта фән һәм техниканың заманча казанышларын кулланмыйча торып, җәмәгать урыннарында һәм торак пунктларда халыкны техноген, техник һәм башка һәлакәтләрдән саклап калу мөмкин түгел. Казан – куркынычсызлык өлкәсендә алдынгы тәҗрибәләрне эшләп чыгару, ныгыту һәм үстерү буенча үзәккә әйләнеп бара. Конференциянең иң әһәмиятле максатларыннан берсе – Универсиада уздырганда тупланган тәҗрибәне өлешләп тикшерү һәм үстерү булачак”, - диде Ю. Демидов.

Күргәзмәдә шәхси саклану, янгын сүндерү, куркынычсызлык чаралары, видеокүзәтү системалары өчен җиһазлар һ.б. заманча җайланмалар урын алган. Биредә Татарстанның 9 министрлыгы һәм ведомствосы үз экспозицияләрен тәкъдим итә.