Илдар Халиков: Куркынычсызлыкны тәэмин итү технологик һәм социаль прогресс фонында тармак кысаларыннан чыга һәм комплекс рәвешен ала

Бүген Татарстан Премьер-министры Илдар Халиков “Тормыш куркынычсызлыгының бүгенге көн проблемалары: хәзерге вакыт һәм киләчәк” исемле III халыкара фәнни-гамәли конференциянең пленар утырышында катнаша.
Конференция “Корстон” мәдәни-күңел ачу комплексында (Казан) уза, аның максаты – тормыш куркынычсызлыгының төрле өлкәләрендә инновацион өйрәнүләр тәҗрибәсен кертү һәм төпле фәнни-тикшеренүләр нәтиҗәләре белән уртаклашу.
Конференциянең пленар утырышы интернет челтәрендә on-line режимында (ТР Хөкүмәтенең рәсми порталында) трансляцияләнде.

Конференцияне оештыручылар: Татарстан Республикасы Министрлар Кабинеты, Россия Федерациясенең Куркынычсызлык Советы, РФ Эчке эшләр министрлыгы, РФ Транспорт министрлыгы, РФ Табигый байлыклар һәм экология министрлыгы, РФ Фән һәм мәгариф министрлыгы, РФ Гражданнар оборонасы эшләре һәм гадәттән тыш хәлләр министрлыгы, РФ Спорт министрлыгы, Россия мәгариф академиясе һ.б.

Конференция эшендә Россия һәм чит илләрнең, шул исәптән АКШ, Австрия, Англия, Германия, Финляндия, Чехия,Йәмән, Мексика, Израиль, Төркия, Иран, Ангола, Индия, Украина, Казакъстан, Белоруссиянең фәнни учреждениеләре, ведомстволары һәм министрлыклары җитәкчеләре, әйдәп баручы белгечләре һәм экспертлары катнаша.

Илдар Халиков ТР Хөкүмәте һәм ТР Президенты исеменнән конференциядә катнашучыларны сәламләде һәм кыскача республиканың 2013 елдагы икътисади күрсәткечләре турында сөйләде.

Илдар Халиков сүзләренчә, куркынычсызлыкны тәэмин итү технологик һәм социаль прогресс фонында тармак кысаларыннан чыга һәм комплекс рәвешен ала. Татарстанда Түбән Камада нефть эшкәртү һәм этилен комплексын, Алабугада автомобильләр җыю производствосын, Казанда композит материаллар производствосын файдалануга тапшыру хезмәттә сакчыллыкны камилләштерүдән, ышанычлы янгын куркынычсызлыгыннан, террористик атакаларны һәм техноген катастрофаларны кисәтүдән башка мөмкин түгел.

Юл хәрәкәтен күзәтү өчен республика шәһәрләре урамнары йөзләрчә автоматик фото һәм видео приборлар белән тәэмин ителгән. Аэропортлар һәм вокзалларда пассажирларны һәм багажларны тикшерү-күзәтү приборлары куелган. Моннан тыш видеокамералар белән Эчке эшләр министрлыгы аиаотрядлары вертолетлары, ЮХИДИ һәм полициянең патруль автомобильләре, тиз медицина ярдәме күрсәтү машиналары җиһазландырылган.

Утырыш кысаларында “Ertico – ITS Europe” компаниясе директоры Расмус Линдхольм, Көнчыгыш Лондон университеты профессоры Дональд Ридли, техник фәннәр докторы, академик, Россия Архитектура һәм төзелеш фәннәре академиясенең беренче вице-президенты Вячеслав Ильичев, “Левинштейн” реабилитация үзәге (Раанан ш., Израиль) директоры урынбасары Юлий Трегер доклад ясадылар.