Илдар Халиков Татарстан Республикасы делегациясе белән Канадага килде

11-13 март көннәрендә ТР Премьер-министры Илдар Халиков Татарстан делегациясе белән Канадага эшлекле очрашуга килде.

ТР Премьер-министры булачак беренче шәһәр - Монреаль (Квебек провинциясе). Монда ТР Хөкүмәте башлыгы 30 дан артык компаниянең штаб-фатирлары һәм фәнни-тикшеренү бүлекчәләре урнашкан җирле Технопарк эшчәнлеге белән танышачак. Технопарк территориясендә Квебек һәм чит ил фирмалары эшләгән алдынгы проектлар гамәлгә ашырыла.

Илдар Халиковның эш программасында шулай ук "Bombardier" заводын (бизнес-класс һәм төбәкләр өчен билгеләнгән очкычлар җитештерүче) һәм "Pratt & Whitney" заводын (гражданлык һәм хәрби авиация өчен авиация двигательләре җитештерүче Америка оешмасы) карау планлаштырылган.

13 март көнне республика делегациясенең эшчәнлеге Торонто шәһәрендә дәвам итәчәк (Онтарио провинциясе). CERBA ( Россия һәм Евразиядә Канада эшлекле ассоциациясе) офисында Татарстан Республикасының инвестицион потенциалы турында презентация булачак, шулай ук Канадада яшәүче татарлар диаспорасы вәкилләре белән очрашу узачак.

Көннең икенче яртысында Татарстан делегациясе МаРс Дискавери Дистрикт (MaRS Discovery District) фәнни-тикшеренү оешмасына һәм Торонто университетына барырга планлаштыра.
Моннан тыш, ТР Премьер-министры Канадада эшлекле очрашулар һәм сөйләшүләр уздырыр, дип көтелә.

Илдар Халиковны озата баручы Татарстан делегациясе составында ТР сәламәтлек саклау министры Гадел Вафин, ТР транспорт һәм юл хуҗалыгы министры Ленар Сафин, ТР Инвестицион үсеш агентлыгы җитәкчесе Линар Якупов, РФнең АКШтагы сәүдә-икътисад вәкиллеге каршындагы Татарстан Республикасының сәүдә-икътисад вәкиле Равил Нигъмәтҗанов һәм башка рәсми затлар бар.