Татарстан Премьер-министры Илдар Халиков Монреаль технопаркында булды

Татарстан Республикасы Премьер-министры Илдар Халиков бүген Канададагы эшлекле очрашу кысаларында Монреаль технопаркында булды.
Илдар Халиковны озата баручы Татарстан делегациясе составында ТР сәламәтлек саклау министры Гадел Вафин, ТР транспорт һәм юл хуҗалыгы министры Ленар Сафин, РФнең АКШтагы сәүдә-икътисад вәкиллеге каршындагы Татарстан Республикасының сәүдә-икътисад вәкиле Равил Нигъмәтҗанов һәм башка рәсми затлар бар.

Татарстан делегациясе өчен технопаркны презентацияләү булды. 1987 елда нигезләнгән Монреаль технопаркы (2007 елга кадәр Сен-Лоран технопаркы) коммерцияле булмаган оешма. Технопарк территориясендә Квебек һәм чит ил фирмалары эшләгән алдынгы проектлар гамәлгә ашырыла.

Монреаль технопаркы якынча 230 га мәйданны били, монда 60 тан артык компаниянең штаб-фатирлары һәм фәнни-тикшеренү бүлекчәләре урнашкан. Аларның составында якынча алты мең кеше эшли.

ТР Премьер-министры Монреаль технопаркының төп акционерлар составы белән кызыксынды. Технопаркның мәйданнары инвесторлар карамагында, ләкин төп идарәне Монреаль Хөкүмәте үзенә ала.

Моннан тыш, Илдар Халиковка, “технопарк, барыннан да бигрәк, икътисадның инновацион үсешенә юнәлгән, ә бәлки территориядән керем алуга түгел”, дип белдерделәр.

Илдар Халиков фикеренчә, иң әһәмиятлесе, интеллектуаль эшчәнлек Монреаль технопаркы эшчәнлегенең йөз процентын алып тора.