2014 нче ел башы безнең өчен упкынга тиң – ТР вице-премьеры Шамил Гафаров республика юлларындагы вазгыять турында

Бүген Татарстан Хөкүмәтенең профильле комиссиясе утырышында вице-премьер – ТР Министрлары Кабинеты Аппараты җитәкчесе Шамил Гафаров республика юлларында иминлекне тәэмин итү мәсьәләләрендә ведомствоара багланышны тәнкыйтьләде.

Утырышны ачканда, ул 2013 нче ел нәтиҗәсен канәгатьләнерлек түгел диде. Аның сүзләренчә, 2014 нче елның гыйнвары һәм феврале гомумән “упкынга тиң”, чөнки бу вакытта соңгы биш елның хисап күрсәткечләре дә арткан.
“Бер яктан без юл-транспорт һәлакәтләренең саны кимүенә ия, ләкин шул ук вакытта һәлак булучыларның саны җитди рәвештә артты”, - диде Гафаров.

Ел башыннан юл һәлакәтләре турында кайгылы мәгълүматларны ТР буенча ЭЭМ ЮХИДИ идарәсе башлыгы Рифкатъ Миңнеханов китерде. Аның сүзләренчә, республикада гыйнвар һәм февральдә 585 юл һәлакәте теркәлгән, 79 кеше һәлак булган, 770е төрле дәрәҗәдәге тән җәрәхәтләре алган. Элеккеге күрсәткечләр белән чагыштырганда, үлүчеләрнең саны 15 кешегә арткан.
Бүгенгә юридик затларның транспортында йөртелә торган балалар катнашында һәлакәтләр мәсьәләсе кискен тора. Юллар тиешле дәрәҗәдә булмау сәбәпле, һәлак булучыларның саны ике тапкырга арткан. Моннан тыш, Рифкатъ Миңнеханов сүзләренчә, күп кеше юл-транспорт һәлакәте булган территориядә яшәмәүче йөртүчеләр гаебе белән һәлак булган.
Ел башыннан республика юлларында автомобильнең уртача тизлеген терки торган 233 система куелырга тиеш (133 куркыныч участокта). Бүгенгә алар 100 участокта урнаштырылган.

Рифкатъ Миңнеханов сүзләренчә, җәяүлеләр өчен юл аркылы чыгу урыннарына аерым игътибар бирергә кирәк. 2014 нче елның феврале ахырыннан җәяүлеләр өчен юл аркылы чыгу урыннары иминлегенә бәйле законнарга үзгәрешләр гамәлгә керде, аның кысаларында мондый эшләргә дәүләт ягыннан финанслау каралган.

“Җәяүле юл аркылы чыгу урынында якланган булырга һәм үзен ышанычлы хис итәргә тиеш. Ләкин статистика киресе турында сөйли”, - дип билгеләде ул. Ел башыннан 199 җәялене бәрдерү очрагы булган, нәтиҗәдә 17 кеше үлгән һәм 189 кеше җәрәхәтләнгән. 89 очрак җәяүле чыгу урынында булган. Бу инцидентлар 4 кешенең гомерен өзгән, 89 кеше җәрәхәтләнгән. Чыгыш ясаучы билгеләп үткәнчә, бу очракларның күбесе Казанга, Түбән Камага һәм Яр Чаллыга туры килә.