Татарстан Премьер-министры Илдар Халиков Монреальда Bombardier заводы эшчәнлеге белән танышты

Бүген Татарстан Республикасы Премьер-министры Илдар Халиков, Канададагы эшлекле очрашу кысаларында, Монреальда "Bombardier" заводының җитештерү мәйданчыкларын карады.

Искә төшерәбез, Bombardier Aerospace компаниясе коммерцияле, махсус, хәрби булмаган самолетлар эшләүче һәм җитештерүче, дөньяга танылган әйдәп баручы компания санала. Ул Boeing һәм Airbus компанияләреннән кала, хәрби булмаган самолетлар җитештерү буенча дөньяда өченче урында тора.

Илдар Халиков һәм Татарстан делегациясе әгъзалары, Bombardier заводы буенча экскурсия барышында, эре хосусый заказчылар өчен билгеләнгән Bombardier бизнес-джетлар җитештерү этаплары белән таныштылар.

Авиакомпания вәкилләре һәм клиентлар белән эшләү буенча менеджер Марк Эрпин Татарстан Премьер-министрын озатып йөргәндә, заказ буенча бер самолетны эшләү өчен 11-12 ай вакыт кирәк, дип аңлатты.

Заводның күргәзмәләр залында эшлекле авиация өчен иң популяр самолетларның берсе- Challenger 605 моделен тәкъдим иттеләр. Татарстан Республикасы делегациясе әгъзаларына шулай ук ЛИН-җитештерү программасы гамәлгә кертелә торган цехларны да күрсәттеләр.

Bombardier вәкилләре сөйләгәнчә, компания үзенчәлекләренең берсе – клиентка аерым игътибар күрсәтү. Мәсәлән, заказчының фюзеляжга соңгы болтны үзе бору һәм фотога төшерү мөмкинлеге бар.

Bombardier компаниясе белән Татарстан Республикасының хезмәттәшлегенә килгәндә, хәзер республиканың һава флоты карамагында (аерым алганда, “Ак Барс Аэро”авиакомпанияләре) "CRJ 200" модельле 15 самолет һәм "Challenger" модельле 6 самолет бар. “Ак Барс Аэро” авиакомпаниясе үзенең авиапаркында Bombardier маркалы самолетларның саны буенча Россиядә өченче урында тора.