Илдар Халиков: “Студентлардан башка киләчәктә үсешнең мөмкин түгеллеген Татарстан аңлый”

Бүген Казанның “УНИКС” мәдәният-спорт комплексында ТР студентлары конференциясе уза. Көн кадагында – Татарстан Республикасы Студентлар лигасының V президентын сайлау.

Пленар утырышта рәсми затлардан ТР Премьер-министры Илдар Халиков, ТР яшьләр эшләре һәм спорт министры Рафис Борһанов, ТР мәгариф һәм фән министрының беренче урынбасары Данил Мостафин, КФУ президенты Мәгъзүм Сәлахов катнашты.

ТР Студентлар лигасының 2010-2014 нче елларда җитәкчелек иткән президенты Тимур Сөләйманов лиганың соңгы дүрт елгы эшчәнлеге юнәлешләре турында хисап тотты. Яңа президентлыкка кандидатлар – Казан илкүләм тикшеренү-технологик университеты студенты Элькин Искәндәров һәм КФУ студенты Илдар Хуҗҗәтов студентлар лигасының алдагы үсеше буенча үз күзаллауларына корылган чыгышларын тәкъдим итте.

Татарстан Президенты, Хөкүмәте, Дәүләт Советы исеменнән конференциядә катнашучыларны ТР Премьер-министры Илдар Халиков сәламләде. “Бүген, теләсә нинди дәүләт өчен җаваплы булган кебек үк, студентлар лигасы өчен дә, һичшиксез, - җаваплы көн. Барлык мәсьәләләрне координацияләүче, республика студентларының зур гвардиясе проблемаларын хәл итү юлларын эзләячәк җитәкчене билгеләү көне”, - дип башлады чыгышын Хөкүмәт башлыгы. Ул Татарстанда 250 меңләп студент белем алуын искәртеп үтеп, чирек миллион кешене илнең кайбер субъектларына һәм хәтта зур булмаган дәүләтләргә тиңләрлек булуын билгеләп узды. “Бүген студентлар өчен генә түгел, - республика җәмәгатьчелеге өчен дә тарихи вакыйга”, - дип белдерде Илдар Халиков. Премьер ассызыклап үткәнчә, бүген яңа җитәкчене билгеләү генә түгел, ә элеккеге президентның вәкаләтләре төгәлләнүе көне дә. “Тимурның соңгы дүрт елда башкарган эшләренә югары бәя бирерлек, бүген студентлар тормышында гамәлгә ашырылган күп кенә эшләр – аның казанышы”, - дип белдерде Илдар Халиков һәм аңа тырышлыгы өчен олы рәхмәтен җиткерде. Хөкүмәт җитәкчесенең әлеге сүзләрен зал көчле алкышлар белән каршы алды.

Форсаттан файдаланып, Премьер-министр “Студентлар лигасы” оешмасын 18 еллыгы белән тәбрикләде. “18 ел ул – берничә буын студентлары узган юл. Бүген конференциянең ничек үткәрелүе дә, яңа президент тәхетенә ике кандидатның бик җанлы дебатлары да, кандидатларның үз фикерен җиткерә белеп, профессиональ докладлар әзерли белүе дә, залның кәефе дә – бүгенге көндә Татарстанның Студентлар лигасының аягында нык басып торуы гына түгел, ә илдә иң яхшылардан саналуы дәлиле дә”, - дип билгеләп үтте Илдар Халиков һәм студентларны бәйрәм белән котлады.

Хөкүмәт башлыгы бүгенге көндә студентларга үзләрен күрсәтеп, мөмкинлекләрен тормышка ашыру өчен бик уңайлы шартлар тудырылуын ассызыклап : “Соңгы 30 елда студентларның камилләшүе өчен мондый кулай чорның әлегә булганы юк иде”, - диде. Аның әйтүенчә, элек грантлар да, фәнни казанышларны, социаль инфраструктура объектларын финанслау кебек күренешләр дә вуз даирәсендә юк иде. “Шуңа күрә яшермим: без бу игътибардан нәтиҗәлелек тә күрергә телибез. Студентлар иҗтимагый-сәяси казанышлары белән генә чикләнмичә, мөмкин кадәр күбрәк фәнни эшләнмәләр белән дә шөгыльләнсен иде. Аларның исемнәре Россия фән дөньясында гына түгел, халыкара аренада да танылсын иде”, - дигән теләктә калды Илдар Халиков.

Премьер-министр бүгенге көндә яшьләр мохитендә үзеңне бу тормышта ничек күрсәтү, үз урыныңны ничек табу проблемасы булуын да шәрехләп үтте. “Без бу проблеманы аңлыйбыз, аны бергәләп хәл итәрбез. Студентлар лигасының яңа президенты белән берлектә, яңа вариантлар, уртак эш формалары пәйда булыр дип уйлыйм”, - диде Илдар Халиков.

Хөкүмәт башлыгы Универсиадага әзерлек барышында һәм аны үткәргәндә барлык өлкәләрдә үзләреннән өлеш керткән студентларга рәхмәтен җиткерде. “Татарстан. илнең югары үсеш алган төбәкләренең берсе буларак, киләчәктә иҗтимагый-сәяси өлкәме ул, фән, мәгариф, сәламәтлек саклау, спортмы – барлык тармакларда да сезнең көчегезгә таяна. Сездән башка алдагы үсешкә ирешеп булмаячак”, - дип мөрәҗәгать итте Илдар Халиков студентларга.

“Тормышның һәр өлкәсендә җиңүләргә ирешегез, - дип, ул аларга уңышлар һәм бүген студентлар лигасына яхшы президент сайлануын теләде. - Яңа җитәкче 250 меңнән артык студентны үзе артыннан ияртерлек булсын”, - дип тәмамлады чыгышын Хөкүмәт җитәкчесе.