Илдар Халиков: Соңгы биш елда тиешенчә медицина ярдәме күрсәтелмәгәнгә гражданнарның мөрәҗәгате 2,8 тапкырга арткан

Татарстан Республикасы Сәламәтлек саклау министрлыгы коллегиясендә төп мәсьәлә медицина хезмәткәрләренең һәм медицина оешмалары башлыкларының һөнәри җаваплылыгын арттыру турында булды.

Коллегия бүген югары медицина технологияләре үзәге бинасында узды (Казан, Оренбург тракты). Утырышта ТР Премьер-министры Илдар Халиков, ТР Президентының социаль мәсьәләләр буенча ярдәмчесеТатьяна Ларионова, РФ Тикшерү комитетының ТР буенча тикшерү идарәсе җитәкчесе Павел Николаев, ТР прокурорының беренче урынбасары Артем Николаев катнашты.

“Һәрвакыт һәм һәр җирдә медицина учреждениеләренең эше игътибар үзәгендә,- диде Илдар Халиков, коллегия утырышын ачып.- Медицина учреждениесенә килгән кешеләрнең һәркайсы ярдәмгә мохтаҗ икәнен истә тотарга кирәк”.

Бүген сәламәтлек саклау тармагында реаль проблемалар күп, дип ассызыклады Илдар Халиков.
Проблемалыларның берсе буларак ул беренчел медицина звеносын атады. Сәламәтлек саклау системасында булган проблемалар буенча без, халыкның табибләрнең ялгышына бик актив игътибар бирүен күрәбез,- диде ул.
Соңгы биш елда тиешенчә медицина ярдәме күрсәтелмәгәнгә гражданнарның мөрәҗәгате 2,8 тапкырга арткан, шуның белән бергә жалобаларның яртысы – медицина ярдәменең түбән сыйфатлы булуына карый.
Илдар Халиков сүзләренчә, мондый очракта медучреждение һәм медицина хезмәткәрләренең эшчәнлегенә дөрес һәм үз вакытында бәя бирергә кирәк.

Илдар Халиков шулай түләүле медицина ярдәме турында да искә төшерде. Аның фикеренчә, туләүле хезмәтләр халыкны талауга әйләнергә тиеш түгел, һәр граждан түләүсез медицина ярдәме алырга хаклы.

Барлык медицина хезмәткәрләре Гиппократ антын истә тотарга тиеш, дип искә төшерде ТР Хөкүмәте башлыгы.