Бурычлары аркасында, Татарстанда яшәүче 8,5 мең кеше чит илләргә чыга алмаячак

2014 нче ел башыннан бурычлыларга карата чит илләргә чыгуны вакытлыча чикләү турында 4,5 меңнән артык карар чыгарылган, моның нәтиҗәсендә, 210,5 млн сум акча түләттерелгән. Бу хакта бүген ТР Хөкүмәте йортында узган брифингта РФ Суд приставлары федераль хезмәтенең ТР буенча идарәсе җитәкчесе Радик Ильясов хәбәр итте.

“Практика күрсәткәнчә, Россия Федерациясеннән чит илләргә чыгу хокукын вакытлыча чикләү – бурычлыларны әҗәтләрен түләттерүгә этәрүче нәтиҗәле ысулларның берсе”, - дип белдерде республиканың баш суд приставы. Ул хәбәр иткәнчә, узган елгыларны да исәпкә алып, бүгенге көндә чит илгә чыгу өчен 8,5 мең Татарстанлыга рөхсәт юк.

Радик Ильясов бурычлары аркасында чит илләргә чыга алмау буенча кара исемлеккә эләгүчеләр санының елдан-ел артуын билгеләп үтте. 2012 нче елда 8,5 мең карар чыгарылган, бурычлылар 103 млн сум күләмендәге бурычларын түләгән. 2013 нче елда Суд приставлары хезмәтенең ТР буенча идарәсе тарафыннан бурычлы затларны Россия чикләреннән чыгу буенча вакытлыча чикләү кертү турында 20 меңнән артык карар чыгарылган. “Суд приставларының Татарстан буенча идарәсе бурычлыларны чит илләргә чыгармау буенча вакытлыча чикләү кертү турындагы карарлар санын быел тагын да арттырырга ниятли”, - дип кисәтеп куйды ТР баш суд приставы.

Билгеле булганча, кара исемлеккә бурычлары 10 мең сумнан арткан затлар гына кертелә. Чит илгә сәфәр тотарга җыенучыларга киңәш итеп шуны әйтергә кирәк: бурыч түләнгәч тә, чикләүне гамәлдән төшерү өчен, 7 тәүлек вакыт бирелә. Шуңа күрә башкарма производстволар буенча бурычларны каплауны очыш алдыннан күпкә иртәрәк кайгыртырга кирәк, ди Радик Ильясов.

ТР баш суд приставы бүгенге көндә республикада 600 меңләп бурычлы зат булуы турында хәбәр итте. Аларның һәркайсы суд приставлары идарәсе сайтына кереп, исем-фамилиясен, туган елын кертеп, мәгълүматлар базасында үз бурычларын карый ала.