Казан Кремлендә РФ һәм ТР дәүләт бүләкләре бирелде

Бүген Казан Кремлендә ТР Премьер-министры Илдар Халиков РФ һәм ТР дәүләт бүләкләрен тапшырды.

ТР Хөкүмәте башлыгы билгеләп үткәнчә, бүләкләнүчеләр арасында – төрле белгечлек һәм һөнәр вәкилләре: табиблар, производство хезмәтчәннәре, фән, мәдәният һәм сәнгать эшлеклеләре.

“Сезнең хезмәт Татарстан җитәкчелеге һәм Россия җитәкчелеге дәрәҗәсендә билгеләнгән”, - дип ассызыклады И.Халиков.

Татарстан – Россиянең үсеш алган төбәкләренең берсе. “Һәм бу күп очракта сезнең хезмәт ярдәмендә”, - диде И.Халиков. Аның сүзләренчә, елдан-ел Татарстан тулай төбәк продукты, эшкәртү производствосы, сәүдә, нефть, полиэтилен, каучук, автомобиль шиннары, йөк автомобильләре җитештерү буенча илдә лидерларның берсе булып тора. Моннан тыш, республика авыл хуҗалыгында югары темпларны саклый алды. Премьер-министр шулай ук фән һәм мәдәният, сәламәтлек саклау һәм спорт өлкәсендә казанышларга игътибар итте.

“Сезнең һәрберегезнең уңышы – республикабыз һәм илебез үсешенә керткән өлеше. Алар бик зур иҗтимагый әһәмияткә ия, фидакарь хезмәт үрнәге булып тора”, - дип ышана И.Халиков.

Мәдәният, матбугат һәм телевидение өлкәсендә зур хезмәт, күп еллар дәвамында нәтиҗәле эшчәнлек өчен, “РФның атказанган мәдәният хезмәткәре” исеме “Республика Татарстан” газетасы баш мөхәррире Александр Латышевка һәм “Татарстан” ДТРК радиотапшырулар хезмәте башлыгы Тәүфыйк Сәгыйтовка бирелде.

5 бала анасы Гөлнара Ибраһимова (Кукмара районы) һәм Азнакайдан 5 бала анасы Елена Исламова, балалар тәрбияләүдә һәм гаилә традицияләрен ныгытуда уңышлар өчен, ТРның “Ана даны” медале белән бүләкләнде.

Моннан тыш, “ТРның атказанган сәнгать эшлеклесе” мактаулы исеме “Яңа гасыр” ТРК музыкаль һәм әдәби программалар редакциясенең баш режиссеры Дания Гаязовага,
“ТРның атказанган табибы” исеме – Казанның 8 нче шәһәр хастаханәсе баш табибы Фәрит Дәүләтшинга, “ТРның атказанган мәдәният хезмәткәре” исеме - И.В.Әүһадиев исемендәге Казан музыка көллияте директоры Айрат Җаппаровка бирелде.

Бүләкләнүчеләр арасында шулай ук ТР мөселманнары Диния нәзарәте аппараты җитәкчесе Айдар Сәлимгәрәев (“ТРның атказанган матбугат һәм массакүләм коммуникацияләр хезмәткәре”), “Юридик белем бирү үзәге” ҖЧҖ директоры Камил Мөхәммәтов (“ТРның атказанган юристы”) һ.б. булды.