Татарстан мәдәният эшлеклеләрен Кырымда мәдәни мирасны саклауда өлеш керткәннәре өчен бүләкләделәр

Татарстан мәдәният эшлеклеләре Кырым Республикасы белән Севастополь шәһәрендә Россия мәдәни мирасын саклауда шәхсән өлеш керткән өчен Россия мәдәният министры Рәхмәт хаты белән бүләкләнде. Бүләкләрне ТР Премьер-министры Илдар Халиков тапшырды. Чара ТР Хөкүмәт йортында узды.

Бүләкләү тантанасы алдыннан Илдар Халиков, Кырым һәм Севастопольдә яшәүчеләргә ярдәм итү үтенеченә беренче булып җавап биргән Татарстан мәдәният хезмәткәрләренә рәхмәт белдерде. “Безнең коллективлар Кырымда профессиональ дәрәҗәләрен һәм осталыкларын гына күрсәтеп калмады, ә бәлки патриот та, куелган бурычларны башкаруда кыю да булдылар”, - дип билгеләп үтте И.Халиков. Ул Татарстан мәдәният министры Айрат Сибагатуллинга оештыру эшләре өчен аерым рәхмәт белдерде.
“Мин сезгә Татарстан Президенты һәм Россия мәдәният министры исеменнән рәхмәт белдерәм. Тагын да югары дәрәҗәдә бүләкләр тапшырырга мөмкин – без каршы түгел”, дип шаяртты Илдар Халиков бүләкләр тапшырылгач.

Татарстан мәдәният министры Айрат Сибагатуллин белән ТР Мәдәният министрының төбәкара, милләтара хезмәттәшлек һәм күргәзмә эшчәнлеге бүлеге җитәкчесе Денис Блиновка Россия мәдәният министры Рәхмәт хаты тапшырылды.

Шулай ук ТР Дәүләт фольклор музыкасы ансамбле артистлары һәм сәнгать җитәкчеләре, “Ворожея” рус җыр театры, ТР Дәүләт җыр һәм бию ансамбле, “Бермәнчек” Дәүләт керәшен фольклор ансамбле, шулай ук “Казан егетләре” ансамбле егетләре Кырымда һәм Севастопольдә мәдәни мирасны саклауда өлеш керткән өчен бүләкләнде.

Моннан тыш, Россия мәдәният министры бүләге белән Г.Тукай исемендәге Татар дәүләт филармониясе һәм М.Җәлил исемендәге Татар дәүләт опера һәм балет академия театры солисты Владимир Васильев, “Татарстан” ДТРК алып баручысы Самирә Фәхретдинова, С.Сәйдәшев исемендәге Зур концерт залы баш администраторы Равия Хәбибуллина да билгеләп үтелде.