Илдар Халиков Казан Универсиадасында югары спорт нәтиҗәләре өчен бүләкләр тапшырды

Бүген ТР Премьер-министры Илдар Халиков Татарстанлыларга 2013 елгы Универсиадада югары спорт нәтиҗәләре өчен Россия Федерациясе һәм Татарстан Республикасы бүләкләре тапшырды. Моннан тыш, Татарстан Хөкүмәте башлыгы республиканың мәдәният эшлеклеләренә Кырым Республикасы белән Севастополь шәһәрендә Россия мәдәни мирасын саклауда шәхсән өлеш керткән өчен Россия мәдәният министры Рәхмәт хатларын тапшырды.

Бүләкләү тантанасы алдыннан Илдар Халиков, бу кадәр күпсанлы бүләк тапшырганым юк иде дип белдерде. “Барлык бүләкләр дә җитди, - диде ул. – Универсиада бүләкләрен тапшыру сузылды, әмма соң булса да уң булсын. Россия һәм Татарстан бүләкләрен тапшыру мөмкинлегенә ия булуыма шатмын”.

Казан Универсиадасында югары спорт уңышларына ирешкән өчен стендка ату буенча халыкара класслы Россия спорт мастеры Николай Теплый һәм чирәмдәге хоккей буенча халыкара класслы РФ спорт мастеры Алексей Майоров Россия Президенты Мактау грамоталары белән бүләкләнде.
Ярышлар призерлары, спорт мастерлары Дмитрий Хомяков, Светлана Крашенинникова, Антонина Савельева Россия Президенты Рәхмәт хатларына ия булды.

“Түбән Кама 1 нче номерле пассажир автотранспорт предприятиесе” ААҖ гендиректоры Агтас Галиәхмәтов “ТР да җирле үзидарәне үстерүдә хезмәтләре өчен” Татарстан Республикасы медале, Казан Универсиадасы Башкарма дирекциясе җитәкчеләре Фәрит Абдулганиев, Азат Галиәхмәтов, Дания Вәлиева “Фидакарь хезмәте өчен” ТР медальләре белән бүләкләнде.

Универсиада дирекциясенең вакытлыча корылмалары департаменты җитәкчесе Сергей Озеровка Татарстанның Атказанган физик культура хезмәткәре исеме бирелде. Универсиаданың Башкарма дирекциясе гендиректоры урынбасары Дмитрий Михайлов ТРның атказанган мәгълүматлаштыру һәм элемтә хезмәткәре булды.
“ТР Югары мәктәбе атказанган хезмәткәре” исеме Казан Универсиадасы Башкарма дирекциясе аппараты гендиректоры урынбасары Лариса Сулимега бирелде.


Шулай ук ТР Яшьләр эшләре һәм спорт министрлыгы, Казан Универсиадасы Башкарма дирекциясе хезмәткәрләре Татарстан Президентының Рәхмәт хаты һәм республика вузлары ректорлары һәм проректорлары Россия Спорт министрлыгы Мактау грамоталары белән билгеләп үтелде. Шулай ук Татарстан Министрлар Кабинеты Рәхмәт хатлары тапшырылды.