Илдар Халиков: “Халык контроле” системасы республика халкы арасында актуальлек һәм популярлыкка ирешә

Бүген Татарстан Республикасының “Халык контроле” дәүләт мәгълүмат системасы республика халкы арасында зур актуальлек һәм популярлыкка ирешә, һәм бу мөрәҗәгать итүчеләр саны буенча да күренә.

ТР Премьер-министры хәбәр иткәнчә, 2014 елның 1 кварталында 3428 мөрәҗәгать килгән, бу 2013 елның шул чоры белән чагыштырганда 124%ка күбрәк.

ТР Хөкүмәт башлыгы билгеләвенчә, узган ел белән чагыштырганда, мөрәҗәгатьләр буенча нигезләнгән баш тартулар саны кими, ә хәл ителгән мәсьәләләр саны арта бара. Үсеш динамикасы күзәтелә, муниципаль бюджетлар мәсьәләләрне хәл итү өчен акча таба, диде ул. Илдар Халиков шулай ук бу мәсьәләләрне хәл итү мөмкинлеген бирәчәк яңа республика программалары барлыкка килүе турында белдерде.

Халык тарафыннан күтәрелгән һәм һаман да актуаль булган бик җитди мәсьәләләрнең берсе – юлларда йөрергә яки машина узарга комачаулый торган итеп куелган автомобильләр, дип хәбәр итте Татарстан Премьер-министры. Бу мәсьәлә Эчке эшләр министрлыгының ЮХИДИ, ТР Гадәттән тыш хәлләр министрлыгы вәкилләре катнашында хәл ителә, диде ул.

“Халык контроле” дәүләт мәгълүмат системасының 2014 елның 1 кварталында эш нәтиҗәләре турында ТР мәгълүматлаштыру һәм элемтә министры урынбасары Тимур Зарипов доклад ясады. Аның хәбәр итүенчә, 2014 елның 1 кварталында 3428 мөрәҗәгать һәм аларга 25 меңнән артык комментарий алынган.