Татарстанда Сучжоу паркы үрнәге буенча индустриаль парк төзү планлаштырыла

Татарстан районнарының берсендә индустриаль парк төзеләчәк, әлеге эш барышында Кытайдагы Сучжоу паркы тәҗрибәсе эшкә җигеләчәк. Бу хакта бүген ТР Министрлар Кабинетында Президент Рөстәм Миңнеханов җитәкчелегендәге Татарстан делегациясенең Кытайга эш сәфәре йомгакларына багышланган брифингта ТР сәнәгать һәм сәүдә министрының беренче урынбасары Руслан Кәбиров хәбәр итте.

“Безгә республикада кече һәм урта предприятиеләр өчен индустриаль парклар рәвешендәге мәйданчыклар булдыру тәҗрибәсе бик кызыклы. Май аена Кытай Халык Республикасы мәйданнарының берсенең концепциясе буенча, Татарстанның Казанга якын урнашкан муниципаль районнарының берсендә индустриаль парк төзелешен башлап җибәрү билгеләнгән”, - дип белдерде Руслан Кәбиров. Ул паркның тәгаен кайда урнашачагы турындагы мәгълүматны әлегә сер итеп саклануын әйтте, ләкин журналистларның бу хакта беренче булып ишетәчәгенә вәгъдә бирде.

Май аенда Идел буе федераль округы һәм Янцзы елгасының югары һәм урта агымнары төбәкләре хезмәттәшлеге кысаларында, Татарстан Хунань провинциясе белән килешү имзалауны ниятли. Әлеге документта индустриаль мәйданчыклар булдыру, фән, сәламәтлек саклау һәм башка тармакларда хезмәттәшлек итү мәсьәләләре урын алачак.