Минтимер Шәймиев Төркиянең Россиядәге илчесе Айдын Сезгин белән очрашты

Бүген Татарстан Республикасы Дәүләт Киңәшчесе Минтимер Шәймиев Төркия Республикасының Россия Федерациясендәге Гадәттән тыш һәм Тулы вәкаләтле илчесе Айдын Аднан Сезгин белән очрашты, ул Казанга “Казан – 2014 елда төрки дөньяның мәдәни башкаласы” елы ачылышы тантанасында катнашу өчен килгән.

Очрашу башланганда Минтимер Шәймиев, Төркия Республикасы төрки дөньяның үзәге булып тора һәм төрки халыкларның бердәм мәдәниятен үстерүгә ярдәм итә, дип белдерде.
“Шуңа бәйле рәвештә без 2014 елда Казанны төрки дөньяның мәдәни башкаласы итеп игълан иткәне өчен ТӨРКСОЙ оешмасына рәхмәт белдерәбез”,- диде ул.

Очрашуда катнашучылар Татарстан һәм Төркиянең мәдәният һәм мәгариф өлкәсендәге хезмәттәшлекнең аерым юнәлешләре турында фикер алыштылар.

Айдын Сезгин, республиканың тарихи-мәдәни ядкәрләрен яңадан торгызу буенча “Яңарыш” фонды проектының гамәлгә ашырылу процессын игътибар белән күзәтүен белдерде.

Әңгәмә барышында шулай ук Кырымның РФ составына керүенә бәйле мәсьәләләр турында да сөйләштеләр. Айдын Сезгин Төркия җитәкчелегенең, хәзерге сәяси шартларда Кырым татарларының язмышы турында борчылуын һәм Минтимер Шәймиевнең фикерен ишетәсе килү теләге булуын белдерде.

ТР Дәүләт Киңәшчесе Кырым татарлары милли мәҗлесенең элеккеге башлыгы, Украинаның Югары Рада депутаты Мостафа Җәмилев белән әңгәмәсе турында сөйләде. “Татарстанның федераль үзәк белән мөнәсәбәтләрне җайга салу тәҗрибәсе бар. Бу мәсьәләләрдә без Кырым җитәкчелегенә ярдәм итәргә әзер. Татарстан Президенты Рөстәм Миңнеханов берничә тапкыр Кырымда булды, хәзерге вакытта Татарстан Республикасы белән Кырым Республикасы арасында барлык яктан да элемтәләр һәм хезмәттәшлек урнаштырыла”,-диде ул.

Минтимер Шәймиев, РФ Президенты Владимир Путинның “Әрмән, болгар, грек, Кырым татарлары һәм немец халыкларын реабилитацияләү һәм аларны яңадан кайтару һәм үстерүгә дәүләт ярдәме буенча чаралар турында”гы 2014 елның 21 апреленнән булган Указының мөһимлеген ассызыклады. Аның фикеренчә, бу документ Кырым татарларының үсеш юлларын билгеләү, аларның телләрен һәм мәдәниятләрен саклау буенча мәсьәләләр хакында фикер алышуга мөмкинлекләр ача.

Очрашуда шулай ук ТР Дәүләт Киңәшчесе секретариаты җитәкчесе Евгений Гришин, Төркия Республикасының Казандагы Генераль Консулы Сабри Тунч Ангылы һәм башка рәсми затлар катнашты.