Казанда Габдулла Тукайның туган көнендә бөек шагыйрь һәйкәленә чәчәкләр салдылар

Бүген, Габдулла Тукайның туган көнендә, бөек татар шагыйре һәйкәленә чәчәкләр салу тантанасы булды.

Бу чарада Татарстан Президенты Рөстәм Миңнеханов, ТӨРКСОЙ генераль секретаре Дүсен Касеинов, Кырымның вице-премьер вазифаларын башкаручы Ленур Исламов, Казан мэры Илсур Метшин, республика парламенты деутатлары, республика министрлыклары һәм ведомстволары җитәкчеләре, иҗади интеллигенция вәкилләре һәм Татарстан башкаласының күп санлы кунаклары катнашты.

Дүсен Касеинов журналистларга биргән әңгәмәсендә: “Тукай – татар халкының иң танылган улларының берсе, аны төрки халыктан аермыйбыз һәм аның турында төрки дөньяның танылган вәкиле буларак сөйлибез, - диде. - Безнең өчен бөек шагыйрьнең туган көнендә, 2014 елда Казанның төрки дөнья мәдәни башкаласы дип игълан ителүе мөһим”, - дип өстәде Халыкара төрки мәдәният оешмасы генераль секретаре.

Кырым делегациясе вәкиле Ленур Исламов та Казанга сәфәрдән алган хис-кичерешләре белән уртаклашты: “Мин Казанда 90 нчы еллларда булдым – шәһәр нык үзгәргән. Биредә Бакчасарайдагы кебек дустанә мохит... Тукай ирек турында әйткәндә, ул безнең азатлык турында белдергән. Безнең тамырлар бер үк төрле – төрки, безгә аны үстерергә һәм сакларга кирәк”, - дип сөйләде Ленур Исламов. Ул тагын бер тапкыр татар халкына, ярдәм күрсәтүләре өчен, рәхмәт белдерде.