Рөстәм Миңнеханов Төркия Президенты белән очрашты
Бүген Татарстан Республикасы Президенты Рөстәм Миңнеханов Төрекмәнстанга визиты кысаларында Төркия Республикасы Президенты Абдуллах Гүл белән очрашты. Ашхабадта узган бу очрашуда Төркия Республикасы авыл хуҗалыгы һәм терлекчелек министры Мәхмәт Мәхди Экер, Төркия Президенты администрациясенең генераль секретаре Мостафа Исән, Төркия чит илләр эшләре министры урынбасары Наҗи Кору, Төркия Республикасы парламенты әгъзасы Мостафа Капуҗу, Татарстан Республикасы Премьер-министры урынбасары – сәнәгать һәм сәүдә министры Равиль Зарипов, Татарстан Республикасы транспорт һәм юллар хуҗалыгы министры Ленар Сафин, Татарстан Республикасы Инвестицион үсеш агентлыгы җитәкчесе Линар Якупов катнашты.
"Без 2009 елда Казанга визитыгызны зур канәгатьләнү белән искә төшерәбез, ул безнең мөнәсәбәтләргә куәтле этәргеч булды", - дип мөрәҗәгать итте Рөстәм Миңнеханов Абдуллах Гюльгә.
Р.Миңнеханов билгеләп үткәнчә, Төркия чит илләр катнашындагы уртак предприятиеләр буенча Татарстан Республикасында беренче урында тора. "Алабуга" махсус икътисадый зона территориясендә генә дә белдерелгән Төркия инвестицияләре күләме 1,5 млрд. доллар тәшкил итә, һәм күп кенә проектларга Абдуллах Гюльнең 2009 елда Казанга визитыннан соң нигез салынды.
Татарстан Республикасы Президенты Абдуллах Гүлгә хәбәр иткәнчә, кичә генә ул "Алабуга" махсус икътисадый зонасы территориясендә, РФ беренче вице-премьеры Игорь Шувалов һәм Чит илләр инвестицияләре буенча консультатив совет утырышында катнашучылар белән бергә, Төркия предприятеләрендә булган. Рөстәм Миңнеханов Абдуллах Гүлне яңа җитештерүләр ачылышына чакырды.
Р.Миңнеханов сүзләренчә, республика җитәкчелеге Төркия белән мөнәсәбәтләр үсешендә бер урында таптанмый: 30 апрельдә Татарстан Республикасы делегациясе Рөстәм Миңнеханов җитәкчелегендә Анталиягә бизнес-визит ясаячак, ә май азагында исә Төркиягә тагын бер визит планлаштырыла. "Без төрек партнерларыбыз белән аралашып торачакбыз һәм аларны Татарстанга чакырабыз", - диде Татарстан Президенты һәм Төркия компанияләре дә Татарстан Республикасы территориясендәге "Иннополис" һәм "Смарт Сити Казан" яңа масштаблы проектларын гамәлгә ашыруда актив катнашырлар”, – дип ышаныч белдерде.
Татарстан белән Төркия Республикасы арасындагы багланышлар үсешенә, Рөстәм Миңнеханов фикеренчә, федераль Хөкүмәт ярдәме дә зур этәргеч, Татарстан Республикасы шәһәрләре һәм Стамбул арасында тотрыклы һава юллары урнашты.
Мәдәни багланышларның динамик үсешенең тагын бер күренеше –Төркия делегациясенең “Казан – 2014 елгы төрки дөньяның мәдәни башкаласы” елын ачуда катнашуы. Рөстәм Миңнеханов Төркия Республикасы җитәкчелегенә Казанны 2014 елгы төрки дөньяның мәдәни башкаласы итеп сайлап алуда ярдәме өчен рәхмәт белдерде.
Абдуллах Гүл "Шишеҗам" һәм "Кастамону Энтегре" заводларын ачу тантанасында катнаша алуына өмет белдерде. Ул шулай ук Татарстан белән Төркия арасындагы эшлекле багланышлар үсешенә ике арада урнаштырылган һава юллары этәргеч булу белән килеште.
"Без һәрвакыт илебездә сезне күрергә шат булачакбыз, - дип мөрәҗәгать итте Абдуллах Гүл Рөстәм Миңнехановка. - Якын киләчәктә Анталиягә эшлекле визитыгыз безнең мөнәсәбәтләр үсешенә ярдәм итәр, дип ышанам".
Яклар шулай ук Россия җәмгыятенә Кырым татарларының интеграцияләнүләре мәсьәләсе буенча да фикер алыштылар. Абдуллах Гюль Кырым татарлары өчен аларның милли үзенчәлекләрен саклап калу буенча мөмкинлекләр тудырырга кирәк дип ассызыклады. Үз чиратында Рөстәм Миңнеханов Төркия Республикасы Президентына Россия Федарациясе җитәкчелеге тарафыннан кирәкле чаралар күрелүен һәм Кырым татарлары өчен тиешле гарантияләр тәэмин ителәчәген белдерде. Татарстан Президенты хәбәр иткәнчә, үз ягыннан ул шәхсән Кырым татарлары белән Россия Федарациясе җитәкчелеге арасында конструктив диалог урнаштыруга ярдәм итәчәген белдерде.