Илдар Халиков Кырым татар халкы мәҗлесе делегациясе белән очрашты

Бүген ТР Премьер-министры Илдар Халиков Татарстанга килгән Кырым татар халкы мәҗлесе делегациясе белән очрашты. ТР Хөкүмәте Йортында узган очрашуда ТР вице-премьеры – ТР сәнәгать һәм сәүдә министры Равил Зарипов, ТР Президентының халыкара мәсьәләләр буенча ярдәмчесе Радик Гыйматдинов, Бөтендөнья татар конгрессы башкарма комитеты рәисе Ринат Закиров, Кырым татар халкы мәҗлесе рәисе урынбасары Нариман Җәләлов, Мәҗлес әгъзалары катнашты.

Бүген делегация әгъзаларын сәламләп, Илдар Халиков Казанга килүләре өчен рәхмәт белдерде. “Без сезнең сәфәрегезнең бай булуын, безнең якынрак таныша алуыбызны, республикабызда ничек яшәвебезне күрүегезне теләдек. Безнең дуслыкның гасырлар дәвамында яшәгән традицияләре дәвам итәргә тиеш”,- дип белдерде Илдар Халиков.

Илдар Халиков хәбәр иткәнчә, бүген ТР Президенты Рөстәм Миңнеханов Бакчасарай тарихи-мәдәни саклаулыгына янгыннан саклану сигнализациясен җиһазлауга һәм атаклы Хан сараенда электр белән тәэмин итүне яңадан торгызуга акча бирү турында карар кабул иткән. Шулай ук ТР җитәкчелеге Хан сараеның реконструкцияләү кирәк булган бүлмәләрен яңартуга акча бирү турында тәкъдим белән РФ Мәдәният министрлыгына мөрәҗәгать итәчәк.

ТР Премьер-министры Мәҗлес делегациясе әгъзаларына ТР Хөкүмәте эшчәнлеге турында сөйләде, Кырым һәм ТР хезмәттәшлегендә өстенлекле булырга мөмкин булган юнәлешләргә аерым басым ясады. Илдар Халиков республикада милли мәгариф системасы турында хәбәр итте, Россия законнарының РФдә яшәүче барлык халыклар өчен милли мәктәпләр булдырырга мөмкинлек бирүен ассызыклады. Сәламәтлек саклау өлкәсендә Татарстан Кырымнан килгән пациентларга югары технологияле ярдәм күрсәтү генә түгел, ә бәлки медицина хезмәткәрләрен һәм табибларны укытырга да әзер.

Кырым татар халкы мәҗлесе рәисе урынбасары Нариман Җәләлов үз чиратында делегациянең барлык әгъзалары исеменнән җылы кабул итүләре өчен Татарстан җитәкчелегенә рәхмәт белдерде. “Безнең өчен Татарстанга килү, бөтен төрки дөнья өчен әһәмиятле булган чараларда катнашу бик мөһим иде, һәм без үзебезне аның бер өлеше итеп тойдык”, - дип сөйләде Н.Җәләлов.


Нариман Җәләлов сүзләренчә, Кырым татар халкы мәҗлесе Татарстан белән барлык дәрәҗәдә үзара аңлашуга ирешергә өметләнә, һәм моның өчен ТР җитәкчеләре белән очрашулар планлаштырылган. Ул хәбәр иткәнчә, Болгарда мәдәни һәм тарихи ядкәрләрне саклауның нинди дәрәҗәдә алып барылуы, делегация әгъзаларында тәэсир калдырган. “Без Болгарда күргәннәрне үзебездә дә тормышка ашыра алыр идек, Кырымда сакланырга тиешле тарихи урыннар бик күп”, - дип белдерде ул.

Нариман Җәләлов Россия җәмгыятенә интеграцияләнү мәсьәләсендә Кырым татарларына ярдәм иткән өчен Татарстан җитәкчелегенә аерым рәхмәт белдерде. “Үзебезнең халыкка интеграциянең ассимиляция булмавын аңлату мөһим, һәм Татарстан үрнәге моны күрсәтә ала”, - дип ассызыклады ул.