ТР Премьер-министры Буа һәм Чүпрәле районнарында кыр эшләре барышы белән танышты

Бүген ТР Премьер-министры Илдар Халиков Буа һәм Чүпрәле районнарына эш сәфәрендә кыр эшләре барышы белән танышып йөрде.

Элек ул Буа районы кырларын очкычтан карап үтте, аннары Кошки-Тиняково торак пунктында районның авыл хуҗалыгы предриятиеләре җитәкчеләре белән киңәшмә үткәрде. Аннары Чүпрәле районына юнәлделәр, анда ТР Премьер-министры район башлыгы Александр Шадриков озатуында Кече Чынлы җирле торак пунктлар кырларын карады. Ул авыл хуҗалыгы предприятиеләре җитәкчеләре белән киңәшмә үткәрде. Анда, авыл хуҗалыгы проблемаларыннан тыш, җирле халык мәсьәләләре турында да фикерләштеләр.

Шул ук вакытта ТР Премьер-министры урынбасары - авыл хуҗалыгы һәм азык-төлек министры Марат Әхмәтов, зур мөмкинлекләргә карамастан, район потенциалы гамәлгә куелмаган, дип билгеләп үтте. Чүпрәле районы территориясендә иң яхшы туфрак һәм хезмәт резервлары бар һәм бу иң яхшы күрсәткечләр өчен нигез булып тора.

Илдар Халиков журналистлар белән фикер алышканда, Буа һәм Чүпрәле районнарында язгы кыр эшләренең яртысы беткән, дип билгеләп үтте. Ул биредә техника әзерләнгән һәм кешеләр оештырылган төстә эшләвен күрде.

“Без, әлбәттә, республиканың бу территориясендәге районнар эшләрне төгәлләр дип өметләнәбез. Язгы бер көн ел туйдыра, дигән гыйбарә бар, шуңа күрә башка районнарга да яхшы оештырылган төстә эшләү һәм яхшы шартларда язгы кыр эшләрен мөмкин кадәр тизрәк төгәлләү зарур”, - дип белдерде Премьер-министр.

Бүгенге көндә авыл хуҗалыгының күп кенә юнәлешләренә ярдәм итүдә проблема бар, федераль дәрәҗәдә финанслауны киметү турындагы карар да авыл хуҗалыгына җитди югалту китерә.

“Бүген без Россия Федерациясе дәрәҗәсенә мөрәҗәгать иттек һәм вәзгыять үзгәрер дип өметләнәбез, - диде Илдар Халиков. - Алга китеш бар икәнлеген күрәбез. Ике районда да уңай нәтиҗәләр күрәбез, шул исәптә керемле предприятиеләр саны арта. Авыл хуҗалыгы өлкәсенә ярдәм күрсәтелгәндә, Татарстан өчен рентабельле бизнес булачагына ышанабыз”, - диде ТР Хөкүмәт башлыгы.