Илдар Халиков “Берлек-2014 – Җиңү варислары” Бөтенроссия җыены ачылышында катнашты

Бүген Чаллыда “Ватан-ана” (“Родина-мать”) мемориаль комплексы янында хәрби-спорт оешмаларының һәм кадет корпусларының “Берлек-2014 – Җиңү варислары” («Союз-2014 - наследники Победы») Бөтенроссия яшьләр укыту җыенының тантаналы ачылышы узды.
Анда ТР Премьер–министры Илдар Халиков, Чаллы шәһәре мэры Васил Шәйхразиев, ТР хәрби комиссары Сергей Погодин, очучы-космонавт, Россия Герое, Кыргызстан Герое Салиҗан Шәрипов, ирекле көрәш буенча Россиянең баш тренеры Хаҗимурад Магомедов һ.б катнашты.

Кунаклар алдында шәһәр кадетлары чыгыш ясады. Алар үзләренең осталыкларын күрсәттеләр.

Татарстан Президенты исеменнән бәйрәм кунакларына, Бөек Ватан сугышы ветераннарына Премьер-министр Илдар Халиков мөрәҗәгать итте.
Чаллы шәһәре тарихта беренче тапкыр “Җиңү варислары” Бөтенроссия җыены катнашучыларын каршы ала, монда илнең төрле төбәкләреннән 350дән артык егет һәм кыз җыелды. Автошәһәрдә үсеп килүче буында патриотизмны тәрбияләүнең төрле формалары бар: бу - 1 нче номерлы пост, кадет мәктәпләре, дип белдерде ул.

“Безгә яңартылган “Ватан-ана”комплексын ачу мөмкинлеге бирелде, Чаллы яңартылган һәйкәл янында Җиңүнең 69 еллыгын билгеләячәк. Әлбәттә, бу үсеп килүче буында патриотлыкны тәрбияләүнең яхшы үрнәге булып тора, Бөек Ватан сугышы тарихы турында дөрес күзаллау формалаштырырга ярдәм итә”, - диде Илдар Халиков.

Җыенның ачылышы белән Чаллы шәһәре мэры Васил Шәйхразиев та котлады.
“Сез, Җиңүнең варислары, ата-бабаларыбызның батырлыкларын дәвам итүчеләр. Бу җиңүне без һәрвакыт истә тотарга тиеш. Чаллыда моның өчен күп эшләнә. Без бүген яңартылган мемориаль комплексында Россиянең иң патриотик слетында катнашучылар белән торабыз”,- диде ул.

Бу чара тәмамланганда бәйрәм кунаклары “Ватан-ана” мемориалына чәчәкләр салдылар.