Илдар Халиков Бөек Ватан сугышы елларында һәлак булган совет сугышчылары һәйкәленә чәчәкләр салды

Бүген Татарстан Республикасы Премьер-министры Илдар Халиков 1941-1945 еллардагы Бөек Ватан сугышында һәлак булган совет сугышчыларын искә алды.

Казанның Арча зиратында ТР Хөкүмәте башлыгы һәлак булган сугышчылар хөрмәтенә куелган “Җиңүче солдат” монументына венок куйды.

Алга таба, Арча зиратында күмелгән совет солдатлары каберләре янында өч тапкыр туптан аттылар. Хәрби оркестр Россия һәм Татарстанның дәүләт гимннарын башкарды. Аннан соң, тантаналы чарада катнашучылар алдыннан Бөек Ватан сугышы вакытындагы формадан солдатлар тантаналы марш белән уздылар.

Хәрбиләр күмелгән каберләргә веноклар һәм чәчәкләр салу тантанасында ТР Президентының социаль мәсьәләләр буенча ярдәмчесе Татьяна Ларионова, ТР Премьер-министр урынбасары – ТР Министрлар Кабинеты аппараты җитәкчесе Шамил Гафаров, Казанның башкарма комитет җитәкчесе Денис Калинкин, Бөек Ватан сугышы ветераннары, Советлар Союзы Геройлары Сабир Әхтәмов һәм Борис Кузнецов, хәрби хезмәткәрләр катнашты.

Чәчәкләр һәм венокларны шулай ук “Скорбящий воин” һәйкәленә, легендар очучы, Советлар Союзы Герое, Казанның мактаулы гражданы Михаил Девятаев каберенә салдылар.