ТР Премьер-министры “Закон территориясе” конкурсында җиңүчеләрне бүләкләде

Бүген Казанда “Закон территориясе” республика конкурсына нәтиҗә ясау тантанасы узды. Тантанада Татарстан Республикасы Премьер-министры Илдар Халиков катнашты.

“Закон территориясе” җәмәгать тәртибе урнаштыруда, яшүсмерләргә һәм яшьләргә хокукый тәрбия бирүгә, хокук бозуларны булдырмауга өлеш керткән муниципаль районнар, шәһәр округлары һәм авыл җирлекләре җитәкчеләр һәм физик затларның уңай тәҗрибәсен тарату, җәмәгатьчелек фикерен белдерү максатыннан үткәрелә.

Конкурс авыл җирлекләре, муниципаль районнар һәм шәһәр округлары, предприятие һәм оешмалар, югары һәм урта һөнәри белем бирү учреждениеләре, яшүсмерләр һәм яшьләр белән эшләүче спорт, мәдәният үзәкләре, шәхси сак предприятиеләре, хокук саклау юнәлешендә эшчәнлек алып баручы иҗтимагый берләшмәләр арасында уздырыла.

Илдар Халиков тантана кунакларын һәм катнашучыларны сәламләп, “Закон территориясе” конкурсын Татарстанда яшәүчеләр өчен мөһим һәм кирәкле конкурсларның берсе, дип атады.

Татарстан Премьер-министры билгеләвенчә, бу конкурс республика Хөкүмәте химаясында өченче тапкыр үткәрелә, анда елдан-ел күбрәк предприятиеләр, оешмалар, иҗтимагый берләшмәләр җәлеп ителә. “Һәм без бу эшчәнлекнең төгәл нәтиҗәләрен дә күрәбез”, - дип ассызыклады Илдар Халиков.

Аның сүзләренчә, узган ел Татарстанда полиция хезмәткәрләре иҗтимагый берләшмә әгъзалары белән бергә җинаять кылуда шикләнелгән 23 мең затны тоткарлаган, шул исәптән 1100- җинаять кылуда шикләнелә. Республикада җинаятьчелеккә каршы торуның уңай нәтиҗәләре күренә.

“Муниципаль район һәм шәһәр округы территориясендә хокук тәртибе тәэмин итүгә өлеш керткән өчен” номинациясе лауреатларына һәм җиңүчеләренә Илдар Халиков дипломнар тапшырды. Өченче урын өчен Биектау районы башлыгы Рөстәм Кәлимуллин бүләкләнде, икенче урынны Азнакай районы башлыгы Марсель Шәйдуллин яулады. Түбән Кама шәһәре һәм районы башлыгы Айдар Метшин номинациядә җиңүче булды.

Алга таба тантана барышында конкурсның тагын 6 номинациясендә бүләкләр тапшыру булды.