Татарстанда Җиңүнең 70 еллыгы уңаеннан Бөек Ватан сугышы ветераннары өчен теплоходта круиз оештырылачак

Бөек Ватан сугышында Җиңүнең 70 еллыгы уңаеннан, 21 майдан 3 июньгә кадәр Бөек Ватан сугышы ветераннары өчен Казан - Санкт-Петербург круизы оештырылачак.

Бу хакта бүген ТР Министрлар Кабинетында узган брифингта Татарстан Республикасы хезмәт, мәшгульлек һәм социаль яклау министры урынбасары Азат Габделәхәтов хәбәр итте.

Круизда Ленинградны азат итүдә катнашкан 80 ветеран һәм Казан Суворов училищесының 60 курсанты катнашачак.

ТР мәдәният министры урынбасары Гүзәл Нигъмәтуллина сүзләренчә, Җиңүнең 69 еллыгын бәйрәм итү өчен Татарстанның 2 меңнән артык мәдәният учреждениесе бу чараларны оештыруда актив катнашкан.

Г.Камал исемендәге татар дәүләт академия театрында сугыш ветераннары, аларның тол калган хатыннары һәм тыл хезмәткәрләре өчен хәйрия тамашалары оештырылган. Татарстанның 19 районыннан 400 дән артык кеше алты спектакль караган.

ТР фән һәм мәгариф министры урынбасары Светлана Гыйниатуллина хәбәр иткәнчә, быелгы елның сентябреннән ТР Фән һәм мәгариф министрлыгы “Татмедиа” белән бергә Бөек Җиңүгә багышланган яңа проект башлап җибәрәчәк. “ТНВ” телеканалында рус һәм татар телләрендә “Җиңүнең бәясе”исемендә тапшырулар циклы планлаштырыла.

Тимуровчылар хәрәкәте үсеп килүче буынны тәрбияләүдә иң көчле чараларның берсе булып кала. Түбән Кама индустриаль техникум студентлары Бөек Ватан сугышы ветераннарына ярдәм итә, Казан механика-технология техникумы волонтерлары өлешчә ремонт ясый, Алабуга политехника колледжы студентлары кием тегәләр һәм көнкүреш техникасын ремотлауда ярдәм күрсәтәләр.