Татарстанда Республика кан үзәге ачылды

Бъген Казанда Республика кан үзәген тантаналы ачу булды (Җиңү проспекты, 85). Бу чарада Россияя сәламәтлек саклау министры Вероника Скворцова,ТР Премьер-министры Илдар Халиков, РФ сәламәтлек саклау министры урынбасары Айрат Фәррахов, ТР Президентының социаль мәсьәләләр буенча ярдәмчесе Татьяна Ларионова,Федераль медицина-биология агентлыгы (ФМБА) директоры Владимир Уйба катнашты.

Бүген Республика кан үзәге – ул гомуми мәйданы 6,2 мең кв. метр булган өч катлы бина, барлык Европа стандартларына туры килә. Яңа үзәктә керү һәм чыгу контроленең төгәл системасы, донорлар хәрәкәте логистикасы төзелгән. Проектның гомуми финанслау күләме 880 816,3 мең сум тәшкил итә, шул исәптән РФ бюджетыннан ул – 458 024,5 мең сум, Татарстан бюджетыннан – 422 791,8 мең сум.

Вероника Скворцова, Казандагы кан үзәге – ул илдә иң яхшы үзәкләрнең берсе, дип белдерде. ТР Президентына проектның гамәлгә ашырылуы өчен рәхмәтен җиткерде. Ул шулай ук төзүчеләргә аерым рәхмәт әйтте.
Вероника Скворцова алдынгы хезмәткәрләргә дәүләт бүләкләре тапшырды.

Илдар Халиков үз чиратында, “Татарстанлыларның сәламәтлеге” дип аталган проект фундаментына өстәлгән тагын бер “кирпеч” дип атады. Бүген медицина хезмәткәрләренең канны саклау һәм аны авыруларга бирергә әзер булу мөмкинлеге бар, диде ул.

Тантаналы чыгышлардан соң үзәкнең символик ачкычын Республика кан үзәгенең баш табибы Рамил Тураев кабул итеп алды.
Чарада катнашучылар һавага йөрәк рәвешендәге шарлар очырдылар.

Аннан соң кунаклар яңа бинаны карадылар, кан әзерләү һәм консервацияләү бүлеге белән таныштылар.
Вероника Скворцова журналистларга үз фикерләрен җиткерде: “Бу үзәк канның куркынычсызлыгын тәэмин итә, аның сыйфаты берничә этап аша контрольдә тотыла. Вирусология һәм бактериология лабораторияләре бар, заманча экспресс-тестлар кертелгән”.
Биредә донорлар өчен барлык уңайлыклар тудырылган, ял залы, донорларга кан биргәч, яхшы туклануы өчен махсус зал бар, дип аерым ассызыклады ул.

“Донорлык – иң игелекле эшләрнең берсе”,-дип саный Вероника Скворцова. Ул үзенең дә берничә тапкыр донор буларак кан бирүе турында хәбәр итте.