Казанда WorldSkills Russia – 2014 эшче һөнәрләр чемпионаты башланды

Бүген Казанда WorldSkills Russia – 2014 милли чемпионаты- һөнәри осталыкның икенче Бөтенроссия конкурсы ачылды. Универсиада авылындагы Халыкара мәгълүмат үзәгендә узган тантанада Россия Хөкүмәтенең вице-премьеры Ольга Голодец һәм Татарстан Республикасы Премьер-министры Илдар Халиков катнашты.

WorldSkills Russia – 2014 милли чемпионаты- һөнәри осталыкның икенче Бөтенроссия конкурсы Казанда 16 майдан 20 майга кадәр узачак. Анда Россиянең 40 төбәгеннән якынча 450 яшүсмерләр катнашачак. Чемпионатта 35 комплект бүләк уйнатылачак, җиңүчеләр 2014 елның октябрендә Франциядә булачак Европа EuroSkills чемпионатында катнашу хокукын алачаклар.

Катнашучыларның эшләренә Россия һәм чит илләрдән килгән 392 эксперт бәя бирәчәк.

Ярышлар “Казан ярминкәсе” күргәзмә комплексында узачак. Монда шулай ук сәнәгать предприятиеләре, эшмәкәрлек, министрлык һәм ведомстволар вәкилләре катнашында семинарлар һәм түгәрәк өстәлләр булачак.

Ольга Голодец Россия Хөкүмәте Рәисе Дмитрий Медведев исеменнән сәлам җиткерде һәм үзе дә ярышларда катнашучыларны сәламләде.
“Безнең өчен бу үзенчәлекле чемпионат, чөнки ул безнең илебезнең икътисади мәсьәләләрен хәл итәргә булышып кына калмый, ә бәлки безнең өчен иң мөһиме- һәр кешенең потенциалын ачу”,- дип белдерде ул.

Илдар Халиков чемпионат ачылышына килүе өчен Ольга Голодецка рәхмәт белдерде һәм чемпионатта катнашучыларны һәм кунакларны Татарстан Президенты исеменнән сәламләде. Ярышларда уңышлар һәм Казанда булудан матур тәэсирләр алуларын теләде.