Илдар Халиков мәгариф системасының БДИ-2014 уздыруга әзерлеге турында киңәшмәдә катнашты

Бүген Татарстан Республикасы Премьер-министры Илдар Халиков мәгариф системасының БДИ-2014 уздыруга әзерлеге турында бөтенроссия киңәшмәсендә катнашты.
Бу чара видеоконференцэлемтә режимында узды. Казанда трансляция Казан Кремлендә ТР Президенты резиденциясеннән оештырылды.
Федерация субъектлары белән киңәшмәне Россия Хөкүмәте рәисе Дмитрий Медведев уздырды.

Дмитрий Медведев хәбәр иткәнчә, 2014 нче елда, бердәм дәүләт имтиханында якынча 750 мең укучы катнашачак, аның якынча 700 меңе – 2014 нче елда мәктәп тәмамлаучылар. Имтихан тапшыру өчен, якынча 6 мең имтихан уздыру пункты әзерләнгән.

“Быел бу имтиханның үзенчәлеге тагын шунда, - дип ассызыклады Дмитрий Медведев, беренче тапкыр дәүләт аттестациясе Россия стандартлары буенча Кырым Республикасында һәм Севастопольдә уздырылачак”.

“Дәүләт имтиханы гадәти күренешкә әйләнде инде, барысы да бу йомгаклау аттестациясе формасына ияләнде, - диде Дмитрий Медведев. – Ләкин бу дәүләт имтиханы системасы идеаль дигән сүз түгел. Мәсәлән, 2013ел нәтиҗәләре буенча бердәм дәүләт имтиханы уздырганда 1 меңнән артык тәртип бозу теркәлгән. Нигездә, болар имтихан башланганчы контроль материаллар белән конвертны ачуга бәйле. Икенче яктан, бу мәктәп укучыларының кәрәзле телефоннардан һәм башка техник чараларан файдалануы. Һәм экспертлар тарафыннан имтихан эшләрен объектив бәяләмәү күзәтелә, киләчәктә бу сирәк очрар дип өметләнәм.
Моннан тыш, контроль материаллары законсыз рәвештә интернетта урнаштырылды”.

“Теләсә нинди очракта да бердәм дәүләт имтиханын уздырганда тәртип бозуларга каршы көрәш дәвам итәргә тиеш”, - дип ассызыклады ул.

Аннан соң, мәгариф һәм фән өлкәсендә Федераль күзәтчелек хезмәте җитәкчесе Сергей Кравцов доклад ясады. Аның хәбәр итүенчә, БДИ тапшырганда Россиядә 35 мең видеокүзәтү камерасы урнаштырылачак. Камералардагы язмалар өч ай сакланачак. Шулай ук имтихан барышын 3 мең волонтер – “Гадел БДИ өчен” иҗтимагый хәрәкәтендә катнашучылар күзәтеп торачак.