Татарстанның Лаеш районында шәхси индустриаль парк булачак

Ике елдан Казан янында, Татарстанның Лаеш районында InPark муниципаль дәрәҗәдә шәхси индустриаль парк эшли башлый. Яңа мәйданчык нигезенә таш салу тантанасында бүген Татарстан Республикасы Президенты Рөстәм Миңнеханов катнашты.  

Проектның инвесторы – DoorHan компанияләр төркеме. Компания эшчәнлегенең төп юнәлеше – автоматлаштырылган ишекләр һәм капкалар җитештерү. DoorHan компаниясенең Россиядә, шул исәптән Лаеш районында, Чехия һәм Кытайда производстволары бар. Кытайның Сучжоу шәһәр округында инде күп еллар дәвамында муниципаль дәрәҗәдә индустриаль парк мәйданнарында компаниянең заводы эшли. Андагы тәҗрибәне DoorHan Россиядә дә шундый технопаркларны оештыруда кулланырга җыена.

DoorHan КТ гендиректоры Александр Ханин сүзләренчә, индустриаль паркларны оештыру – компания өчен яңа юнәлеш, беренче проектының урыны итеп Татарстанны DoorHan, инвестицион климатның уңай булуы аркасында, сайлаган.

25 гектар җирдә технопаркның 90 мең квадрат метр мәйданлык өч бинасы урнашачак. 2016 елның дүртенче кварталында 18 мең квадрат метрлык беренче бинаны ачу планлаштырыла. Алга таба мәйданнар тула бара ике ел саен яңа биналарны гамәлгә кертү планлаштырыла.

Проектның гомуми бәясе – миллиард сумнан артык, барлык акчаны компания, башка инвесторларны җәлеп итмичә, үзе кертәчәк. Александр Ханин сүзләренчә, беренче чират 300 млн сумлык булачак.

Тантанадагы чыгышында Татарстан Республикасы Президенты Рөстәм Миңнеханов билгеләгәнчә: “Яңа проектны башлап җибәрү, Россия эшмәкәрлеге көнендә узуы, шатлыклы. Эшмәкәрлеккә ярдәм – дәүләтнең төп бурычы, - дип саный Р.Миңнеханов. – Республикада эре бизнеска мәйданчыкларны үстерү өлешендә без җитәрлек эшләдек, әмма безнең партнерлар тәкъдим иткән кече һәм урта бизнеска парк формасы - безнең өчен яңа”.

«Ышанам ки, әлеге мәйданчык кызыклы булачак һәм DoorHan компанияләр төркеме белән Лаеш районының инвестицион проектына без максималь ярдәм итүебездә ышандырам», - дип белдерде Рөстәм Миңнеханов.

DoorHan КТ гендиректоры Александр Ханин үз чиратында хәбәр иткәнчә, аның Татарстан Президенты белән бер ел элек Сучжоуда узган очрашуында Кытайның муниципаль дәрәҗәдә индустриаль парклар оештыру тәҗрибәсен бирегә күчерү турында сүз барган иде. «Без алынып карарга хәл иттек, һәм килеп чыкса, әлеге тәҗрибәне алга таба да тиражларбыз», - дип әйтте А.Ханин.

Аерым компанияләр төркеме гендиректоры Лаеш муниципаль районы башлыгы Михаил Афанасьевка проектны әзерләүдә ярдәме өчен рәхмәт белдерде.

Тантана ахырында мәртәбәле кунаклар индустриаль парк төзелеше башлануны символлаштырган пазлны җыйдылар.