Илдар Халиков барлык муниципаль районнар белән видеоконференцэлемтә режимында республика киңәшмәсен уздырды

Татарстан Республикасында йортларны капиталь ремонтлау буенча эшләр 40 муниципаль районда 793 объектның 784ендә башланган. Ике атна өчен динамика 28 йорт тәшкил итә. 6 муниципаль районда 12 объектта эшләр графиктан 20%ка артта бара.
Бу хакта бүген ТР Хөкүмәте йортында узган киңәшмәдә ТР төзелеш, архитектура һәм торак коммуналь хуҗалык (ТКХ) министры Ирек Фәйзуллин хәбәр итте.
Киңәшмәне барлык муниципаль районнар белән видеоконференцэлемтә режимында ТР Премьер-министры Илдар Халиков уздырды.

Киңәшмәне ачып, ТР Премьер-министры, бүген ТР Төзелеш, архитектура һәм ТКХ министрлыгы, ТР Баш инвестиция-төзелеш идарәсе вәкилләре республика районнарында һәм алар видеоконференцэлемтә режимында киңәшмәдә катнашты, дип белдерде. Аларның районнарга баруы кайбер объектларны төзү барышын һәм эш графикларын башкаруны тикшерү белән бәйле.

Бүгенге көндә республикада, Татарстан Республикасы Президенты карарлары ярдәмендә, күп программалар барлыкка килде һәм күп кенә социаль объектлар төзелә, диде Илдар Халиков, аеруча, авыл җирлегендә. Төзүчеләр өчен мөһим этап башланды – җәйге сезон, бу чорда якынча 7,5 мең объектны төзергә һәм төгәлләргә өлгерергә һәм моны вакытында, сыйфатлы итеп эшләргә кирәк. Илдар Халиков сүзләренчә, халык бу объектларны көтә, бу - ФАП, авыл клублары, балалар бакчалары.

Мәктәпләрне капиталь ремонтлауга килгәндә, 2014 елның 29 нчы маена барлык 159 объектта эш алып барыла, үзләштерү – 62 процент. 7 муниципаль районда 8 мәктәптә эш төгәлләнгән.
ТР Дәүләт төзелеше күзәтчелеге инспекциясе белгечләре 110 объектта 345 тикшерү уздырган. Тикшерү нәтиҗәләре буенча 18 объектта 198 тәртип бозу ачыкланган, шуларның 94е бетерелгән.

2014 нче елда “Һәркемгә уңайлы мохит” программасын финанслау күләме 539,6 млн.сум тәшкил итә, социаль өлкәнең 135 объектында уңайлыклар булдырыла. Бу физкультура һәм
спорт, социаль яклау һәм социаль хезмәт күрсәтү, инвалидларны реабилитацияләү, сәламәтлек саклау, мәдәният, урта махсус белем бирү учреждениеләре.
29 нчы майга, “Ачык Татарстан” мәгълүмат порталы буенча, бу программа буенча эшләр Спас районында һаман башланмаган әле.

2014 нче елда мәктәпләрдә уңайлыклар булдыруга килгәндә, программаны финанслауның гомуми лимиты - 271,9 млн.сум, шул исәптән Россия бюджетыннан 113,5 млн.сум, Татарстан бюджетыннан - 158,4 млн.сум. 2014 нче елда 104 мәктәптә уңайлыклар булдырыла. Программага 42муниципаль районда белем бирү учреждениеләре кертелгән. “Ачык Татарстан” мәгълүмат порталы буенча, эшләр барлык 42 муниципаль районда алып барыла.

Ирек Фәйзуллин шулай ук газ, электр энергиясе һ.б. өчен түләүләр буенча бурычлары булган муниципаль районнар белән эш баруы турында хәбәр итте.

Илдар Халиков район башлыкларыннан бу мәсьәләгә бик нык игътибар итүләрен сорады. Аның сүзләренчә, бүген бурычлары булмаган унлап район бар. Мондый районнарда үз эшләрен яхшы һәм тыныч башкаралар, һәм бу - башка районнар өчен үрнәк, диде Илдар Халиков.