Илдар Халиков Халыкара Fair Play комитеты президенты белән очрашты

Бүген Татарстан Премьер-министры Илдар Халиков Халыкара Fair Play комитеты президенты Йено Камути белән очрашты. ТР Хөкүмәте йортында узган очрашуда шулай ук РФ Дәүләт думасы депутаты Марат Бариев, ТР яшьләр эшләре һәм спорт буенча министр урынбасары Хәлил Шәйхетдинов, “Спорт проектлары башкарма дирекциясе” автоном коммерцияле булмаган оешма (АНО) җитәкчесе Азат Кадыров катнашты.

Халыкара Fair Play комитеты – халыкара дәүләтнеке булмаган оешма, 1963 елда оеша. Аңа нигез салучылар: БМОның мәгариф, фән һәм мәдәният мәсьәләләре буенча оешмасы (ЮНЕСКО), Бөтендөнья физик тәрбия һәм спорт фәне советы (СИЕПСС), Халыкара спорт матбугаты ассоциациясе (АИПС) һәм XX йөз урталарының атаклы француз теннисчысы Жан Боротра.

Комитет составына 130 коллектив әгъзалары һәм шәхси әгъзалар керә. Комитетның төп эшчәнлек юнәлешләре: спортта гаделлек принципларын пропагандалау һәм ел саен бүләкләр бирү.

Татарстан Премьер-министры Йено Камутины сәламләп, узган ел Казанда узган Бөтендөнья җәйге Универсиада турында сөйләде һәм Универсиададан тыш, Казанда спортның олимпия төрләре буенча Европа чемпионатлары узуын, шәһәрдә югары дәрәҗәдә ярышлар уздыру өчен киң күләмле инфраструктура булдырылуын билгеләп үтте.

Очрашу барышында Йено Камути һәм Илдар Халиков Татарстанда халыкара дәрәҗәдә яңа, зур спорт ярышларын уздыру перспективалары турында фикер алыштылар.