Казанда яшь геологларның республика ачык кыр олимпиадасы башланды

Бүген Казанда “Заречье” сәламәтләндерү лагеренда Татарстанның яшь геологлары арасында республикакүләм ачык кыр олимпиадасы башланды. Олимпиадада Татарстаннан 26 команда һәм Кырым Республикасының Бакчасарай районыннан 1 команда катнаша.

Яшь геологлар республика олимпиадасы катнашучылар парады белән ачылды. Татарстан данын Азнакай, Актаныш, Әлмәт (3 команда), Арча, Баулы, Балтач, Бөгелмә, Түбән Кама, Нурлат, Саба һәм Сарман муниципаль районнары, шулай ук Казаннан (5 команда) һәм Чаллы яклый.

ТР Премьер-министры Илдар Халиков, ТР Президентының нефть һәм нефть-газ ятмалары мәсьәләләре буенча консультанты, Россиянең атказанган геологы Ренат Мөслимов, ТР Премьер-министрының урынбасары – мәгариф һәм фән министры Энгель Фәттахов һ.б. яшь геологларны олимпиада ачылышы белән котлады.

“Бу чарага тырышып әзерләнүегезгә ышанам. Әлбәттә, сезгә педагог, дуслар, өлкән остазлар өйрәткәнне тулысынча күрсәтүегезне телим. Бу олимпиада Татарстанда уза торган башка олимпиадалардан артык аерылмый, - дип билгеләп үтте сәламләү чыгышында Илдар Халиков. – Республикада нефть икътисади һәм социаль үсеш нигезе булып тора, шуңа күрә без нефть табучы, геолог һәм Татарстан икътисадын тәэмин итүче башка һөнәр вәкилләренең кем булуына битараф түгел. Бүген биредә катнашучыларның күбесе республиканың нефть компанияләрендә үз урын табачагына ышанам”.

Россия геологлар җәмгыяте президенты Виктор Орловның да мөрәҗәгате укылды, ул олипиадада катнашучыларга уңышлар, кызыклы очрашулар, мавыктыргыч ял һәм ныклы сәламәтлек теләгән.

ТР Президентының нефть һәм газ ятмаларын эшләү мәсьәләләре буенча киңәшчесе, Россиянең атказанган геологы Ренат Мөслимов олимпиадада катнашучыларга геолог эшенең нечкәлекләре турында сөйләде. “Бу кызыклы эш: көн саен уйлар өчен яңа мәгълүмат аласын. Без геологларны яхшы геологларга һәм Ходайдан бирелгән геологларга бүләбез, безгә соңгылары кирәк. Кызганычка каршы, бүген Ходайдан бирелгән геологлар Казан
университетын тәмамлап, чит илгә китә. Бездә иң яхшы геологлар күп булуын һәм аларның Россиядә, Татарстанда калуларын телим”, - дип мөрәҗәгать итте ул.

ТР Премьер-министры урынбасары – мәгариф һәм фән министры Энгель Фәттахов сүзләренә караганда, Татарстанның 26 мәктәбендә геология буенча база мәйданчыклары булдырылган, алар кече нефть команияләренә ярдәм итә. “Без һәр ел саен геология буенча олимпиада үткәрәчәкбез. Татарстанда перспективалы нефть ятмалары бар, шуңа күрә безнең балалар бу эш белән кызыксынырга тиеш”, - дип ассызыклады ул.

Олимпиада нәтиҗәләре буенча Татарстанның җыелма командасы формалаштырылачак, алар 31 июльдән 11 августка кадәр Алматы шәһәрендә яшь геологлар арасында узачак III Казакъстан ачык кыр олимпиадасында катнашачак.