Татарстанның беренче вице-премьеры Борис Павлов Бөек Ватан сугышында җиңүнең 64 еллыгына багышланган тантаналы чараларда катнашты

Бүген, Җиңү көне алдыннан, Татарстан Республикасы Премьер-министрының беренче урынбасары Борис Павлов Бөек Ватан сугышы ветераннары өчен оештырылган бәйрәм концертында катнашты. Әлеге чара Казанның Авиатөзелеш районында Ленин исемендәге мәдәни-ял итү комплексында узды.
Борис Павлов Татарстан Республикасы җитәкчелеге исеменнән бөтен ветераннарны һәм тыл хезмәтчәннәрен бөек Җиңүнең 64 еллыгы белән тәбрик итте. Ул Татарстан территориясендә 7 укчылар дивизиясе, танклар бригадасы, зенит-артиллерия полкы, авиабригада тупланган булуын искәртте.
Татарстаннан гына да 700 дән артык кеше фронтка киткән, шуларның яртысы диярлек мәңгегә сугыш кырларында ятып калган. Аларның һәркайсы исәннәр хәтерендә озак сакланыр.
“Җиңү хезмәт фронтларында да яуланган. Татарстан оборона сәнәгатенең алдынгы предприятиеләре сугышчыларны корал, сугыш кирәк-яраклары, медицина җиһазлары, нефть продуктлары һәм башкалар белән тәэмин итүгә зур өлеш керткән. Икенче бөтендөнья сугышы елларында республикага 70 тән артык предприятие күчерелгән, аларда 600 дән артык сугыш җиһазы, шул исәптән 22 мең бомбардировщик (Пе-2, По-2, Пе-8), 50 меңнән артык авиамотор, 1 миллионнан артык заряд (“Катюша” лар өчен дә), 4 млрд. патрон җитештерелгән”, - диде Борис Павлов.
Ул Ватанны саклаучылар турында якты истәлекләр һәм алар белән горурлану хисләре хәзерге буын йөрәгендә мәңгегә сакланып калачагын искәртте.