Татарстанның Мамадыш районында “Питрау-2014” бәйрәм ителде

Татарстанның Мамадыш районы Җөри авылында бүген керәшеннәрнең республика күләмендәге “Питрау” халык бәйрәме булды.
Быел ул унбишенче тапкыр уздырылды. Битен ылыслы агачлар каплаган тау итәгендәге Тырлау аланында үткәрелгән бәйрәм берничә мәйданчыкта оештырылган булып, төп чаралар узасы мәйданга җитәрәк, махсус киртәләп алынган кырда ат чабышы халыкны җыйды.
Бәйрәмнең үзендә кунакларга мамадыш, бакалы, чибәркүл, нагайбәк керәшеннәре йортлары стилендәге милли каралты-кураларны карау мөмкинлеге булдырылган иде. Биредә үк фольклор коллективлар кунакларга авыз иҗаты үрнәкләрен тәкъдим итте, халык уеннарына катнаштырды, халык һөнәрчелеге осталары хезмәтләре куелган иде.

Бәйрәмнең шәрәфле кунаклары булып ТР Премьер-министры Илдар Халиков, ТР Президенты Аппараты җитәкчесе Әсгать Сәфәров, ТР Премьер-министры урынбасары – авыл хуҗалыгы һәм азык-төлек министры Марат Әхмәтов килде.

Сәламләү сүзе белән И.Халиков мөрәҗәгать итеп: “Безнең бәйрәмебезгә төрле төбәкләрдән кунаклар килүе куанычлы, ә бу бәйрәм күптән инде керәшеннәрнең генә түгел, республиканың күп кенә халыклары яраткан зур чарасына әйләнде. Менә инде унбишенче тапкыр шушы матур урында була алабыз”, - диде.

Аннары ул ТР Президенты Рөстәм Миңнехановның котлавын укыды. “Бу бәйрәмнең тарихы бай, бүгенгесе мул һәм киләчәге шәп. Рухы белән халыкныкы булган бәйрәмнең нәкъ менә кунакчыл Мамадыш җирендә торгызылып, җете буяулар белән бизәлүе куанычлы. Мәдәният елында Питрау аерым әһәмият ала. Без Татарстанда яшәүче барлык халыкларның республикада мәдәни-тел һәм рухи-әхлакый байлыклары арта баруына горурланабыз”, - диелә тәбрикнамәдә.

Бәйрәм кунаклары башка мәйданчыкларда да булды. Балалар мәйданчыгында зур курчаклар - Микуш исемле сарык белән Аннуш исемле чыпчык – халык әкиятләре геройлары бәйрәмнең иң бәләкәйләренең күңелен ачты.

Аерым мәйданчыкта “Керәшен чибәре” конкурсы узды. Быел анда 10 кыз катнашты. Алар халык җырларын һәм биюләрен башкаруда, милли ризыклар әзерләүдә һәм кыр чәчәкләреннән букет ясауда үзара ярышты. Җиңүчегә көмеш таҗ һәм 50 мең сум күләмендә приз каралган иде. Арада җиңүче таҗына һәм акчалата призга Казан кызы җырчы Алина Давыдова лаек дип табылды.

“Питрау дискотекасы” мәйданчыгында исә яшьләргә күңел ачу программасы әзерләнгән иде, биредә татар эстрадасының яшь йолдызлары чыгыш ясады, конкурслар, уеннар уздырылды.

Үзәк сәхнәдән куелган концертта Венера Ганиева, Георгий Ибушев, Ринат Рәхмәтуллин, Зөһрә Шәрифуллина, Вадим Захаров, “Бәрмәнчек” дәүләт ансамбле һ.б. катнашты.

“Димче Горли почмагы” – ялгызаклар өчен оештырылган махсус мәйданчык шулай дип атала. Биредә үз парыңа катдидатка карата таләпләрне, аның турында күзаллауларыңны язып, заявка калдырырга була. Соңрак аңа димчеләр шалтыратып, әйбәт кандидат табылуын хәбәр итә. Яңа оешкан пар Питрауда танышулары турында сертификат һәм аланга гаилә пары сыйфатында янә килергә чакыру ала.

Мәйданда бу кичтә төп башында сугышу, аякларны бәйләгән килеш узышу, чүлмәк вату, милли көрәш уздырылды. Көрәш батырларының иң көчле өчесенә 3 автомобиль куелган иде. Көн салкынча булса да, сулыкта оештырылган капчык сугыш, куллар белән балык тоту, елга аша аркан буйлап чыгу кебек ярышларга да катнашучылар табылды.

“Питрау” бәйрәме тарихында беренче тапкыр буларак, кыска гына лазерлы шоу булды: биредә нурлардан Мамадыш гербы, “Питрау” бәйрәме символы сурәтләнде.