Татарстан Республикасында 2 августка игеннәр 280 мең гектарда сугылган

Татарстан Республикасында 2014 елның 2 августына 280 мең гектарда игеннәр сугылган. Бу хакта бүген Татарстан Республикасы Хөкүмәте йортында узган республика киңәшмәсендә ТР Премьер-министры урынбасары – ТР авыл хуҗалыгы һәм азык-төлек министры Марат Әхмәтов хәбәр итте.

Киңәшмәне республиканың барлык муниципаль районнары белән видеоконференцэлемтә режимында ТР Премьер-министры Илдар Халиков уздырды.

Марат Әхмәтов алдагы ике атнага һава торышы турында хәбәр итте, бу уңышны җыеп алу шартларында авыл хуҗалыгы өчен аеруча мөһим, диде ул.
Уңыш җыюны оештыруда уңай мисал буларак, Марат Әхмәтов Кайбыч (37% мәйданда җыелган), Буа (34), Апас (32), Әлки ( уңышның өчтән бер өлеше җыелган) районнарын күрсәтте.

Илдар Халиков уңышны җыеп алу өчен барлык көчләрне тупларга чакырды.

Алга таба Марат Әхмәтов республикада азык әзерләүнең барышы турында сөйләде. Республикада 2 августка 1003 мең тонна азык берәмлеге әзерләнгән, шул исәптән печән – 509,6 мең тонна.