Казанда Вальтер Шеель исемендәге форумда медицина хезмәттәшлеге турында килешү имзаланды

Бүген Казанда Югары медицина технологияләре буенча белем бирү үзәгендә сәламәтлек саклау өлкәсендә Германия-Россия мөнәсәбәтләрен ныгыту буенча Вальтер Шеель исемендәге III Россия-немец форумы уза. Аның ачылышында Татарстан Премьер-министры Илдар Халиков катнашты.

Әлеге форум РФ Сәламәтлек саклау министрлыгы инициативасы буенча Татарстан Хөкүмәте ярдәме белән уза. Уздыру урыны буларак Казан сайлануы очраклы түгел. 2013 нче елның декабрендә Алманиянең Бад Кронцинген шәһәрендә медицина реабилитациясе актуаль мәсьәләләре һәм проблемаларын көн үзәгенә куйган Вальтер Шеель исемендәге II форум үтә. Аның эшендә РФ Сәламәтлек саклау министры урынбасары Сергей Краевой, ТР сәламәтлек саклау министры Гадел Вафин һәм башка Россия экспертлары катнаша. Чараны оештыручыларга Татарстан белгечләренең чыгышы аеруча тәэсир итә, моңа бәйле рәвештә, алар чираттагы форумны Казанда уздыруда теләктәшлек күрсәтү үтенече белән мөрәҗәгать итә. Бу инициатива Татарстан Президенты Рөстәм Миңнеханов тарафыннан хуплау таба.

Бүгенге форумда белгечләр тернәкләндерү медицинасы, онкология (ачыклау һәм дәвалау), радиология һәм телемедицина кебек темалар буенча фикер алыша. Чарада мәртәбәле кунаклардан, Р. Кох һәм И. Мечников форумы президенты Хельмут Хан, Сәламәтлек төбәге – Фрайбург оешмасы башкарма директоры Тило Якоб һәм Вальтер Шеель форумы башкарма директоры Кристоф Хеппель катнаша.

“Татарстан өчен танылган немец дәүләт эшлеклесе Вальтер Шеель исемен йөрткән мондый абруйлы форумны уздыру – зур мәртәбә. Моннан алда үткән форумда Татарстан вәкилләре чыгышының Алманиядә зур кызыксыну уятуы күңелгә хуш килә”, - дип, Илдар Халиков РФ Сәламәтлек саклау министрлыгының форумны Казанда үткәрү инициативасының Татарстан Президенты тарафыннан хупланганын билгеләп үтте. Хөкүмәт башлыгы сәламәт тормыш рәвешенә кагылышлы барлык темаларның да әһәмиятле булуын ассызыклап, республикада күптөрле спорт чаралары узуын билгеләп үтте. “Бүгенге форумның эшчәнлегебезнең мөһим юнәлешләренең берсе булган сәламәтлек саклау өлкәсендә Татарстан һәм Алмания арасында багланышларны ныгытырга мөмкинлек бирүенә шатбыз”, - диде ул.

ТР сәламәтлек саклау министры Гадел Вафин исә, мәртәбәле кунакларга Татарстанның соңгы елларда медицина өлкәсендә ирешелгән казанышлары турында бәян итеп, сәламәтлек саклауда өстенлекле юнәлешләргә күзәтү ясады. “Мин һәрвакыт ассызыклап киләм: безнең төп бурыч – халыкның үлем күрсәткечләрен киметү һәм гомер дәвамлылыгын озайту, шуңа күрә безнең өчен Алмания тәҗрибәсе бик мөһим”, - диде министр.

РФ сәламәтлек саклау министры ярдәмчесе Ләлә Габбасова форумда катнашучыларны федераль министрлык исеменнән сәламләде. “Соңгы вакытта сәламәтлек саклау системасында масштаблы үзгәрешләр күзәтелә. Безгә яңа технологияләр өлкәсендә белемнәр белән алмашу кирәк. Татарстанның сәламәтлек саклау өлкәсе Россия Федерациясе флагманнарының берсе булып тора. Бу чараның нәкъ менә Татарстанда, кызыклы проектлар гамәлгә ашырылган җирдә узуы әһәмиятле”, - диде ул.

Хельмут Хан исә, бүгенге форумда катнашып, хезмәттәшлек турында килешү рәсмиләштерелүе үзләре өчен мөһим булуына басым ясады. “Килешү төзеп, без хезмәттәшлегебезне күпкә алга этәрербез дип ышанам”, - диде ул. Мактаулы кунак Татарстан Хөкүмәтенә һәм РФ Сәламәтлек саклау министрлыгына форумга күрсәтелгән җитди игътибар өчен рәхмәтен җиткерде.

Форум кысаларында ТР Сәламәтлек саклау министрлыгы, Р. Кох һәм И. Мечников форумы (Берлин), сәламәтлек төбәге – Фрайбург, Вальтер Шеель форумы (Бад Кроцинген) арасында хезмәттәшлек турында килешү төзелде.