2014 елның беренче яртыеллыгында торак тапшыру буенча Татарстан федерация субъектлары арасында бишенче һәм Идел буе федераль округында беренче урынны алып тора

Татарстан Республикасында 2014 елның беренче яртыеллыгында тулай төбәк продукты күләме 746,8 млрд. сум тәшкил иткән, үсеш темпы чагыштырмача бәяләрдә 101,2% тәшкил иткән. Сәнәгать җитештерүе индексы узган елның шушы чорына 100,6% тәшкил иткән.

Бу хакта бүген Татарстан Республикасы Премьер-министры Илдар Халиков Татарстан Республикасында иң аз хезмәт хакы турында килешүне имзалау процедурасы барышында белдерде. Бу чара ТР Хөкүмәте йортында узды.

Илдар Халиков билгеләгәнчә, яхшы үсеш темпы сәүдә өлкәсендә теркәлгән(5,5%). Республикада инвестицияләрне җәлеп итү процедурасы дәвам итә, җитештерүне яңарту бара, инвестиция проектлары гамәлгә ашырыла. 2014 елның беренче кварталында гына да төп капиталга инвестицияләр күләме 78 млрд. сумнан артык тәшкил иткән, диде ул.

2014 елның беренче яртыеллыгында Татарстанда 1,2 млн.кв. м торак тапшырылган, бу күрсәткеч буенча төбәк федерация субъектлары арасында бишенче, Идел буе федераль округында беренче урынны алып тора, дип хәбәр итте Илдар Халиков.
Бүген Татарстанда Россия Федерациясе Президентының “май указы”на туры китереп, бюджет өлкәсендәге хезмәткәрләргә хезмәт хакын күтәрү өчен барлык кирәкле чаралар эшләнә, диде Илдар Халиков. Мәгариф өлкәсендә хезмәт хакының үсеше 16,8%, сәламәтлек саклау өлкәсендә -17,3%, мәдәният һәм сәнгать өлкәсендә – 30% тәшкил иткән.